Волонтёрлар ободонлаштириш хизмати томонидан тўсатдан эътиборсиз қолдирилган Тошкентдаги «ЦУМ» қаршисида жойлашган боғда тозалаш ишларини амалга оширди. Айнан шу ерда мустақиллик стеласини бунёд этиш режалаштирилмоқда, деб хабар беради «Подробно».
Номаълум сабабларга кўра, сўнгги кунларда ободонлаштириш хизмати ходимлари боғга келмай қўйган. «Ёдингизда бўлса, бу ерга ҳоким келиши айтилганида юздан ортиқ ходимлар тезда тўпланиб, нафақат кўчаларни супурган, балки йўлларни махсус эритмалар билан ювган эди», — дейилади хабарда. Бироқ сўнгги кунларда уларнинг барчаси қаергадир ғойиб бўлган ва боғда секин-аста чиқиндилар тўплана бошлаган.
Шу сабабли Тошкент аҳолиси нафақат боғни ҳимоя қилишга, балки уни тозалашга ҳам киришган. Волонтёрлар ижтимоий тармоқлар орқали бу борада бефарқ бўлмаган инсонларга мурожаат билан чиқди.
«Дўстлар! Эртага соат 11:00 да севимли боғимизда ҳашар ташкиллаштирдик. Сўнгги вақтларда номаълум сабабларга кўра, бу ерни тозаламай қўйишди. Биз, фуқаролар, ўз шаҳримиз ҳақида қайғуришга қодир эканлигимизни кўрсатиб, намуна бўлишимиз керак. Чиқиндилар учун пакетлар, супурги ва тозалашда керак бўладиган бошқа асбоб-анжомлар билан келамиз. Ҳаётимизни янада яхши ва ёрқин қиламиз! Йиғилиш жойи: ‘Мовий гумбазлар’ қаҳвахонаси қаршисидаги ўриндиқ. Вақт: соат 11:00…», — дейилади мурожаатда.
21 февраль куни кўплаб одамлар ушбу чақириққа жавоб тарзида боғга келган. Келганларнинг ҳар бири қўлидан келгунича ёрдам кўрсатган.
«Пойтахт ҳокимлиги ободонлаштириш хизматининг тушунарсиз ишига эътибор қаратишига умид қилишдан бошқа илож йўқ. Ёки боғдаги тозалаш ишлари ҳам энди фақат стела қурилганидан кейин амалга ошириладими?», — дея қайд этилади хабарда.
Эслатиб ўтамиз, Ўзбекистон мустақиллигининг 30 йиллигига бағишлаб «Истиқлол» мажмуасини қуриш ва унда «мустақилликнинг моҳияти ва улкан тарихий аҳамиятини акс эттирувчи монументал композиция»ни яратиш Президентнинг 2020 йил 17 декабрдаги фармонида кўзда тутилган эди. Мажмуани барпо этиш жойи сифатида Шароф Рашидов, Ислом Каримов ва Афросиёб кўчалари оралиғида, Марказий универмаг (ЦУМ) қаршисидаги ҳудуд танланган.
Аввалроқ Жаҳонгир Ортиқхўжаев «Истиқлол» мажмуасини барпо этиш масаласи юзасидан аҳоли билан учрашгани ва боғдаги бир дона дарахт кесилса, ўша куниёқ лавозимидан кетишга тайёрлигини маълум қилган эди. Шунингдек, пойтахт раҳбари Тошкент шаҳар ҳокимлигига ишончсизлик билдираётганларга жавоб қайтарганди.
Изоҳ (0)