Самарқандда пулларини кўпайтириб беришини айтиб, фуқаролардан 22 250 долларгача пул олиб, қайтариб бермаган компания аниқланди

Самарқандда бир қанча фуқароларни алдаб, уларнинг пулларини ўзлаштириб юборган компания аниқланди, дея хабар бермоқда Тергов департаменти.

Қайд этилишича, 2019 йил октябрь ойидан 2020 йилнинг сентябрь ойига қадар Тошкент шаҳрида жойлашган «Бицимплех» МЧЖнинг Самарқанд филиали ходимлари фуқароларга бир йил мобайнида пулларини кўпайтириб олишларини айтиб, уларни ишонтирган.

Компаниянинг офисида фуқароларнинг ҳар биридан 500 АҚШ долларидан 22 250 АҚШ долларигача бўлган пул маблағларини шартнома асосида инвестиция тариқасида қабул қилиб, 2020 йилнинг сентябрь ойига қадар жалб қилинган пуллардан даромад тариқасида 2,5 фоиздан 4 фоизгача пул маблағларини бериб келган. Кейинчалик олган пул маблағларини қайтариб бермасдан келаётганлиги аниқланган.

Ўз навбатида алданиб қолган фуқароларнинг аризаларига асосан Самарқанд шаҳри бўйича ИИО ФМБ ҳузуридаги Тергов бўлими томонидан «Бицимплех» МЧЖнинг мансабдор шахсларига нисбатан Жиноят кодекснинг 168-моддаси 4-қисми «а» банди (жуда кўп миқдорда фирибгарлик) билан жиноят иши қўзғатилган.

Ҳозирда жабрланган фуқароларнинг доираси ва уларга етказилган зарарни қоплашга қаратилган тергов ҳаракатлари олиб борилмоқда.

Бундан аввал сурхондарёлик фуқаро Қашқадарёда яшовчи танишини 215 млн сўмга чув туширгани, Зангиотада суғориладиган ер майдонини ноқонуний сотиб юборган фермер хўжаликлари раҳбарларига нисбатан жиноят иши қўзғатилгани ҳамда Самарқандда ўзини мансабдор кўрсатиб, алдов йўли билан фуқародан 4 миллион сўм талаб қилган экология ходими қўлга олингани ҳақида хабар берилганди.