Ёғочсозлик саноати хом ашё базасини мустаҳкамлаш ва соҳани янада ривожлантириш чора-тадбирлари тўғрисидаги ҳукумат қарори қабул қилинди.
Қарорга кўра, республикада ёғочсозлик соҳасининг хом ашё базаси мустаҳкамланади, мебель саноатининг барча йўналишларини ривожлантириш орқали ёғоч импорти ҳажми камайтирилади.
Қарорга мувофиқ, 2021–2022 йилларда қишлоқ хўжалигида фойдаланишдан чиқиб кетган жами 3 173 гектар захирадаги ерларда ҳамда ўрмон фондининг жами 1 327 гектар тоғолди ва адир ерларида ёнғоқ, чинор, шумтол, қайрағоч ҳамда бошқа мебелбоп дарахт турлари экилади.
Мазкур плантацияларни ташкил этиш учун жами 2 783 600 дона кўчат етиштириш назарда тутилган.
Қайд этилишича, 2021 йил 10 мартдан бошлаб мебель саноатида ёғоч хом ашёси сифатида фойдаланиладиган павловния, ёнғоқ, чинор, шумтол, қайрағоч ҳамда бошқа дарахтлар плантацияларини ташкил этувчиларга зарур кўчат экиш материаллари шартнома асосида етказиб берилади.
Бундан аввал Ўзбекистонда павловния плантациялари ташкил қилиниши, Вазирлар Маҳкамаси қишлоқ хўжалиги экинларини оқилона жойлаштириш тартиби тўғрисидаги низомни тасдиқлагани ҳамда Ўзбекистонда Ўрмон хўжалиги институти ташкил этилиши ҳақида хабар берилганди.
Изоҳ (0)