Ўзбекистонда ёғоч импорти 45,1 млн долларга камайди

Ўзбекистонга 2020 йилда 50 та хорижий мамлакатлардан 566,8 миллион доллар миқдорида ёғоч ва ёғоч буюмлари импорт қилинди, дея хабар қилмоқда Давлат статистика қўмитаси.

Қўмита маълумотларига кўра, бу кўрсаткич 2019 йилга нисбатан 45,1 миллион долларга кам.

Ўзбекистон 2020 йили импорт қилган ёғоч ва ёғоч маҳсулотларининг энг катта улуши Россияга тўғри келди. Мазкур давлатдан Ўзбекистонга 520 миллион доллар миқдорида ёғоч импорт қилинган. Бу эса умумий ёғоч импортининг 91,7 фоизни ташкил қилади.

Ундан кейин Хитой (18,8 миллион), Туркия (6,5 миллион), Беларусь (4,2 миллион), Италия (2,8 миллион), Қирғизистон (2,8 миллион), Украина (2,6 миллион), Қозоғистон (2,6 миллион), Жанубий Корея (1,7 миллион) ва Германия (1,1 миллион) турибди.

Бундан аввал Ўзбекистонда электромобиллар импорти икки йилда 10 баробарга ошгани, 10 ойда неча тонна мандарин импорт қилингани ҳамда мобил телефонлар импорти икки баробарга ошгани ҳақида хабар берилганди.