Samarqandda pullarini ko‘paytirib berishini aytib, fuqarolardan 22 250 dollargacha pul olib, qaytarib bermagan kompaniya aniqlandi

Samarqandda bir qancha fuqarolarni aldab, ularning pullarini o‘zlashtirib yuborgan kompaniya aniqlandi, deya xabar bermoqda Tergov departamenti.

Qayd etilishicha, 2019-yil oktabr oyidan 2020-yilning sentabr oyiga qadar Toshkent shahrida joylashgan “Bitsimplex” MChJning Samarqand filiali xodimlari fuqarolarga bir yil mobaynida pullarini ko‘paytirib olishlarini aytib, ularni ishontirgan.

Kompaniyaning ofisida fuqarolarning har biridan 500 AQSh dollaridan 22 250 AQSh dollarigacha bo‘lgan pul mablag‘larini shartnoma asosida investitsiya tariqasida qabul qilib, 2020-yilning sentabr oyiga qadar jalb qilingan pullardan daromad tariqasida 2,5 foizdan 4 foizgacha pul mablag‘larini berib kelgan. Keyinchalik olgan pul mablag‘larini qaytarib bermasdan kelayotganligi aniqlangan.

O‘z navbatida aldanib qolgan fuqarolarning arizalariga asosan Samarqand shahri bo‘yicha IIO FMB huzuridagi Tergov bo‘limi tomonidan “Bitsimplex” MChJning mansabdor shaxslariga nisbatan Jinoyat kodeksning 168-moddasi 4-qismi “a” bandi (juda ko‘p miqdorda firibgarlik) bilan jinoyat ishi qo‘zg‘atilgan.

Hozirda jabrlangan fuqarolarning doirasi va ularga yetkazilgan zararni qoplashga qaratilgan tergov harakatlari olib borilmoqda.

Bundan avval surxondaryolik fuqaro Qashqadaryoda yashovchi tanishini 215 mln so‘mga chuv tushirgani, Zangiotada sug‘oriladigan yer maydonini noqonuniy sotib yuborgan fermer xo‘jaliklari rahbarlariga nisbatan jinoyat ishi qo‘zg‘atilgani hamda Samarqandda o‘zini mansabdor ko‘rsatib, aldov yo‘li bilan fuqarodan 4 million so‘m talab qilgan ekologiya xodimi qo‘lga olingani haqida xabar berilgandi.