Тошкент шаҳри Яшнобод туманида тез тиббий ёрдам ходимлари беморнинг фарзандлари томонидан калтакланиши оқибатида жонлантириш бўлимига ётқизилди. Бу ҳақда Соғлиқни сақлаш вазирлиги хабар берди.
Қайд этилишича, 19 февраль тунги соат 23:13 да тез тиббий ёрдам колл-марказига Тошкент шаҳри Яшнобод тумани Яшнобод 6-тор кўчасидаги хонадонларнинг биридан чақириқ тушган. Тез тиббий ёрдам бригадаси чақирув жойига соат 23:25 да, яъни 12 дақиқада етиб бориб, хонадондаги бемор тезкор тиббий кўрикдан ўтказилган ва 23:40 да беморнинг аҳволи ўта оғир бўлганлиги учун зудлик билан пойтахтдаги И.Иргашев номли 4-сон шаҳар клиник шифохонасига етказилган.
Муассаса бош шифокори Б. Мамаджоновнинг маълум қилишича, шифохонада 52 ёшли бемор Д.Н.га гипертония касаллиги, гипертоник кризис, ўпка шиши ва агонал ҳолат ташхиси қўйилиб, зудлик билан реанимация бўлимига ётқизилган.
У пайтда беморнинг ҳолати оғир бўлиб, кўз қорачиғи кенгайган, фотореакция аниқланмаган, нафас активлиги кузатилмаган ҳолатда бўлган, уйқу артериясида ҳам пулсни аниқлаб бўлмаган ва шу тариқа беморда клиник ўлим ҳолати қайд этилган.
Беморга сунъий нафас юбориш, юракни бевосита массаж қилиш, дефибриллятор орқали таъсир қилиш ва бошқа муолажалар қилиниб, юрак ва нафас реанимацияси 30 дақиқа давомида 3 марта қайта ўтказилган. Стандартлар бўйича амалга оширилган тезкор муолажаларга қарамасдан, беморда биологик ўлим қайд этилган.
Беморнинг вафоти ҳақида яқинларига маълум қилинганда унинг фарзандлари томонидан хизмат вазифасини бажараётган шифокорларга нисбатан сабабсиз жисмоний тазйиқ ўтказилган.
Бунинг оқибатида шаҳар тез тиббий ёрдам хизматининг шифокори, 32 ёшли Д.У. бош мия ёпиқ жароҳати, бош мия лат ейиши, чап ёноқ соҳаси юмшоқ тўқималарининг лат ейиши, кўкрак қафаси юмшоқ тўқималари лат ейиши, травматик шокнинг 1, 2-даражаси ташхиси билан, яна бир тез тиббий ёрдам хизмат ходими, 21 ёшли А.А. бош мия ёпиқ жароҳати, бош мия чайқалиши, бурун суягининг ёпиқ синиши, кўкрак қафаси соҳаси юмшоқ тўқималари лат ейиши ташхиси билан мазкур шифохонанинг реанимация бўлимига ётқизилган.
Ярим тунда ўз касбий фаолиятини бажариш пайтида тажовузга учраган тиббиёт ходимлари учун Республика шошилинч тиббий ёрдам илмий марказидан нейрохирург шифокорлар таклиф қилинган ва уларга дастлабки қўйилган ташхис тўлиқ тасдиқланган.
Таъкидланишича, 20 февраль тонгда ҳам жабрланган тиббиёт ходимларининг аҳволи оғирлигича қолгани ва уларга махсус жарроҳлик амалиётига тиббий кўрсатма борлиги сабабли Республика шошилинч тиббий ёрдам илмий марказига ўтказилган.
Айни ҳолат юзасидан Соғлиқни сақлаш вазирлиги ҳуқуқни муҳофаза қилувчи органларга мурожаат йўллади. Унда юқорида қайд этилган ҳолатни қатъий назоратга олган ҳолда, айбдор шахслар қаттиқ жавобгарликка тортилишини таъминлашда амалий ёрдам сўралди.
Бундан аввал Жиззахда тиббиёт ходими калтаклангани, Сирдарёда 6 нафар маст фуқаро тез ёрдам ходимларини калтаклагани ҳамда Фарғонада тез ёрдам ходимларини калтаклаган шахс қамоққа олингани ҳақида хабар берилган эди.
Изоҳ (0)