Россия бош вазири Михаил Мишустин мамлакатда коронавирусга қарши учинчи вакцинанинг Чумаков номидаги марказ томонидан ишлаб чиқилгани ва рўйхатдан ўтказилганини эълон қилди. Бу ҳақда «Интерфакс» хабар берди.
Фото: Reuters
«‘КовиВак’ деб номланган учинчи вакцина рўйхатдан ўтказилди, у Чумаков номидаги марказ томонидан ишлаб чиқилган. Март ойи ўртасида дастлабки 120 минг доза фуқароларни эмлашга йўналтирилади», – деган Мишустин вакциналар масаласида ўтказилган йиғилишда.
У Россиянинг коронавирусга қарши профилактика учун учта вакцинага эга дунёдаги ягона давлатга айланганини таъкидлаб ўтган.
Россия соғлиқни сақлаш вазири Михаил Мурашко журналистлар билан мулоқотда препаратнинг хавфсиз ва самарадор эканлиги кўнгиллилар иштирокидаги тадқиқотларда аниқланганини маълум қилган. Унинг сўзларига кўра, вакцина устида ўтказилган кенг миқёсдаги тадқиқотлар у рўйхатдан ўтказилганидан кейин ҳам давом этади.
«Энди учта вакцинага эгамиз ва улар орқали фуқароларни инфекциядан ишончли ҳимоя қилишимиз мумкин», – деган Россия ССВ раҳбари.
Аввал вакцина рўйхатдан ўтказилганидан кейин клиник синовларнинг учинчи босқичи 3 минг нафар кўнгиллида амалга оширилиши ва параллел равишда фуқароларни эмлашга йўналтирилиши хабар қилинган. Шунингдек, марказ директорининг ўринбосари Константин Чернов мартда ‘КовиВак’нинг 100 мингта дозаси билан одамларни эмлаш ишлари бошланиши ҳақида гапирган эди.
Чумаков номидаги марказда ишлаб чиқилган номзод вакцинанинг дунёдаги бошқа шерикларидан фарқи унинг селноверионли вакцина эканлигида, яъни мазкур дори таркибида ўлган SARS-CoV-2 вируси мавжуд. Шунга ўхшаш бошқа бир вакцина Хитойда ишлаб чиқилган.
18 январда Россия президенти Владимир Путиннинг топшириғи билан аҳолини оммавий равишда эмлаш ишларига старт берилган. Айни вақтда аҳолини асосан мамлакатнинг ўзида рўйхатдан ўтказилган вакциналар билан эмлаш амалга оширилмоқда ва асосан Гамалея номидаги марказда ишлаб чиқилган «Спутник V» вакцинасидан фойдаланилмоқда. Марказ директорининг ўринбосари Денис Логунов 10 февраль ҳолатига кўра Россияда вакцинанинг иккала қисми (икки доза) билан 1,7 миллион нафар одам эмлангани ва дастлабки дозани қабул қилиб олганлар сони 2,2 миллиондан ошганини маълум қилган.
Шунингдек, Россияда «ЭпиВакКорона» номли Роспотребнадзорнинг «Вектор» марказида ишлаб чиқилган вакцина ҳам рўйхатдан ўтказилган. Бироқ мазкур препарат билан оммавий равишда эмлаш ишлари февралдан бошланди. 2022 йил март ойигача асосан «Спутник V», баҳордан эса «Спутник» ва «ЭпиВакКорона» билан, март охиридан эса «КовиВак» билан одамларни вакцинация қилиш ишлари амалга оширилади.
Маълумот учун, «Спутник V» вакцинаси Венгрия, Ливан, Серб Республикаси, Жазоир, Аргентина, Беларусь, Боливия, БАА, Сербия, Парагвай, Венесуэла, Мўғулистон, Покистон, Туркманистон, Фаластин ва Эронда фойдаланиш учун тасдиқланган.
Шунингдек, Ўзбекистонда «Спутник V» вакцинасини учинчи босқич клиник синовлари натижалари асосида сертификатлаштирилган ҳолда оммавий қўллашга рухсат берилган. Ўзбекистонда коронавирусга қарши эмлаш март ойининг биринчи ярмида бошланиши маълум қилинган.
