Шавкат Мирзиёев 18 февраль куни «Ўзбекистон Республикасининг Жиноят ва Жиноят-процессуал кодексларига ўзгартиш ва қўшимчалар киритиш тўғрисида»ги қонунни имзолади, деб хабар бермоқда «Gazeta.uz». Ҳужжат Қонунчилик палатаси томонидан 4 декабрь куни қабул қилинган, Сенат томонидан 5 февраль куни маъқулланган.
Қонун билан Жиноят-процессуал кодексига қуйидаги институтлар жорий қилинди:
- кўрсатувларни олдиндан мустаҳкамлаб қўйиш;
- жиноят иши бўйича дастлабки эшитув;
- айбга иқрорлик тўғрисида келишув.
Гувоҳ ва жабрланувчини объектив сабабларга кўра кейинчалик сўроқ қилиш мумкин бўлмай қоладиган ҳолларда (жиноят ишини судга қадар юритиш босқичида гувоҳ ва жабрланувчини оғир касаллиги ёки узоқ муддатга чет давлатга чиқиб кетиш зарурати туфайли кечроқ сўроқ қилиш имконияти бўлмаган тақдирда) уларнинг кўрсатувларини олдиндан мустаҳкамлаб қўйилиши мумкин.
Жиноят иши бўйича дастлабки эшитув — жиноят ишини тўхтатиб туриш, тугатиш, бирлаштириш, айблов далолатномаси ёки хулосасини, тиббий йўсиндаги мажбурлов чорасини қўллаш тўғрисидаги қарорни прокурорга юбориш ҳамда номақбул далилларни чиқариб ташлаш учун асослар мавжуд бўлган тақдирда ўтказилади.
Дастлабки эшитувни ўтказиш давомийлиги 10 суткадан ошмаслиги керак.
Айбга иқрорлик тўғрисида келишув — ўта оғир жиноят ҳисобланмайдиган жиноятлар бўйича айбига иқрор бўлган, жиноятни очишга кўмаклашган ва зарарни бартараф этган гумон қилинувчининг ёки айбланувчининг илтимосномасига асосан прокурор билан тузиладиган келишув.
Қонун билан Жиноят кодексига киритилган қўшимчага кўра, айбга иқрорлик тўғрисида келишув тузилган жиноятлар бўйича жазо белгиланган энг кўп жазонинг ярмидан ошмаган ҳолда тайинланади.
Ушбу қонун расмий эълон қилинган 18 февралдан эътиборан кучга киради.
Айбига иқрорлик бўйича келишув институтини жорий қилиш Президентнинг 2020 йил 10 августдаги «Суд-тергов фаолиятида шахснинг ҳуқуқ ва эркинликларини ҳимоя қилиш кафолатларини янада кучайтириш чора-тадбирлари тўғрисида»ги фармонида кўзда тутилганди.
Изоҳ (0)