Марғилондаги Мустақиллик кўчасида жойлашган тўртта дўконда ёнғин юз берди

Фарғона вилояти, Марғилон шаҳар, Мустақиллик кўчасида жойлашган дўконларда ёнғин содир бўлди, деб хабар беради ФВВ матбуот хизмат.

Маълумотларга кўра, 20 февраль куни соат 05:50 да Марғилон шаҳридаги Мустақиллик кўчасида жойлашган дўконларда ёнғин юзага келганлиги тўғрисида ёнғин-қутқарув хизматига хабар келиб тушган.

Воқеа содир бўлган жойга зудлик билан ФВВ вилоят бошқармасининг 3 та ёнғин-қутқарув экипажи соат 05:54 да етиб борган ва соат 06:30 да ёнғин тўлиқ ўчирилган. Ҳодиса оқибатида 4 та дўконнинг умумий 90 квадрат метр майдонида том ва ички қисмлари ёнган. Ҳаракатлар натижасида савдо дўконларининг 200 квадрат метр майдони офатдан сақлаб қолинган.

Ҳозирда мутахассислар томонидан ёнғин сабаби ва етказилган зарар миқдори аниқланмоқда.

Таъкидланишича, ёнғиндан тан жароҳати олганлар ва ҳалок бўлганлар йўқ.

Аввалроқ Жиззах шаҳридаги пластмасса қувурлар ишлаб чиқарувчи корхонада ёнғин содир бўлгани тўғрисида хабар берилганди.