12 февраль куни ижтимоий тармоқларда чартер рейслар орқали Ўзбекистонга кириб келган фуқаролар норозилиги акс эттирилган видеолавҳа тарқалган ва бунга сабаб қилиб коронавирус инфекциясини аниқлаш учун тўлов нархлари юқорилиги кўрсатилган. «Ўзбекистон темир йўллари» Марказий санитария-эпидемиология станцияси мазкур воқеани ўрганиб чиқди, деб хабар бермоқда компания матбуот хизмати.
Маълум қилинишича, видеолавҳа 2021 йилнинг 17 январида 483-сонли Волжский—Тошкент йўналишдаги чартер рейси орқали Қорақалпоғистон чегара темир йўл бекатига кириб келган йўловчилар томонидан тасвирга олинган. Ушбу вокзалда йўловчилардан COVID-19’ни аниқлаш учун экспресс таҳлиллар «Ажинияз Қарақалпақ» МЧЖ хусусий клиникаси томонидан амалга оширилган.
Таъкидланишича, масъулияти чекланган жамиятлар алоҳида хўжалик юритувчи субъектлар ҳисобланиб, кўрсатилаётган хизматлар нархини мустақил равишда белгилайди ҳамда амалдаги қонунчиликка мувофиқ улар фаолиятига ҳар қандай аралашув ва чекловлар ўрнатилишига йўл қўйилмайди. Шу жумладан, «Ўзбекистон темир йўллари» акциядорлик жамияти томонидан ҳам. Яъни монополияга йўл қўйилмаслиги учун ушбу хусусий клиника фаолиятига тўсқинлик қилиниши мутлақо мумкин эмас.
Хабарда, шунингдек, масъулияти чекланган жамиятлар фаолиятидан норози бўлган фуқаролар ўрнатилган тартибда ҳуқуқни муҳофаза қилувчи ва суд органларига мурожаат қилишлари мумкинлиги билдирилган.
Эслатиб ўтамиз, коронавирус кириб келиши ва тарқалишининг олдини олиш юзасидан чора-тадбирлар дастурини тайёрлаш бўйича Республика махсус комиссияси қарорига асосан, 2020 йилнинг 25 декабридан эътиборан Ўзбекистонга кириб келаётган шахслардан коронавирус инфекцияси антигенини аниқлаш экспресс тестини олиш жорий этилди.
Шунингдек, COVID-19 коронавирус инфекциясини аниқлаш учун таҳлиллар Соғлиқни сақлаш вазирлиги ва Санитария-эпидемиологик осойишталик ва жамоат саломатлиги хизмати томонидан берилган тегишли рухсатнома (лицензия, сертификат)ларга эга бўлган ва мулкчилик шаклидан қатъи назар, тиббиёт муассасалари томонидан амалга оширилади.
Изоҳ (0)