Андижонда Nike ва Adidas бренди остида маҳсулот ишлаб чиқарувчи завод ишга тушади. Бу ҳақда «Ўзчармсаноат» уюшмасига таяниб, Review нашри хабар берди.
Маълум қилинишича, 2019 йил бошида Хитойда Nike, Adidas бренди остида кроссовкалар ишлаб чиқарувчи Tianjin Zhongzhilihua компанияси билан SinoInternational МЧЖ ўртасида келишувга эришилган. Ушбу брендлар остида маҳсулот ишлаб чиқарадиган завод Андижон вилоятида ишга тушади.
Nike ва Adidas кроссовкаларини ишлаб чиқарувчи линия 2021 йил 4-чорагида ишга тушиб, 2022 йилнинг 3-чорагида тўлиқ қувватда ишлай бошлайди. Заводда йилига жами 3 миллион жуфт спорт пойабзали ишлаб чиқарилиши кутилмоқда.
2019 йил бошида амалга оширилган Tianjin Zhongzhilihua компанияси билан SinoInternational МЧЖ ўртасидаги келишувга кўра, Андижон вилоятида 2020—2022 йилдан босқичма-босқич (3 босқичда) Nike ва Adidas кроссовкалари ишлаб чиқаришни йўлга қўйиш ва Марказий Осиё давлатларига тайёр маҳсулотларнинг 50 фоизини экспортга йўналтириш режалаштирилган.
SinoInternational МЧЖ корхонасига Андижон вилояти Асака туманидан 1 гектар ер майдони ажратилган бўлиб, ҳозирда 1000 квадрат метр жойга бино иншоотлари қурилган. Дастгоҳлар олиб келиб ўрнатилган. Корхона 2020 йилнинг 4-чорагида ишга тушган.
Вилоятдаги ишсиз эркаклар ва аёлларни ишга жалб қилган ҳолда ҳозирда синов тариқасида 1 ойда 40 минг жуфт болалар ва ўсмирлар кроссовкалари ишлаб чиқарилмоқда.
Nike, Adidas кроссовкалари талаб даражасида ишлаб чиқарилганидан сўнг ишлаб чиқарилган маҳсулотларнинг 50 фоизини Марказий Осиё давлатларига экспорт қилишни Tianjin Zhongzhilihua компанияси ўз зиммасига олган. Шу билан бирга, SinoInternational МЧЖ халқаро ярмаркаларда иштирок этиш ҳисобига 30 фоизини бошқа давлатларга ва 20 фоизини ички бозорга сотишга келишилган.
Лойиҳа тўлиқ ишга тушиши учун тўғридан-тўғри 12 миллион АҚШ доллари миқдорида маблағ йўналтирилган. Ҳозирда хорижий инвестор томонидан 6 миллион долларлик инвестиция киритилган.
Аввалроқ Президент Шавкат Мирзиёевнинг қарори билан хорижда чарм маҳсулотларини сотиш учун Мултибранд дўконлар ташкил этилиши тўғрисида хабар берилганди. 2019 йилда «Ўзчармсаноат» уюшмаси раиси ўринбосари Фарҳод Нурмуҳаммедов Ўзбекистонда Ўрта Осиё ҳудудида тери ва теридан маҳсулот тайёрланадиган марказ бўлиши учун барча имкониятлар мавжудлигини айтганди.
Изоҳ (0)