Жиззах шаҳрида жойлашган Master Building Products масъулияти чекланган жамиятида ёнғин содир бўлди, деб хабар беради ФВВ матбуот хизмати.
Маълум қилинишича, 19 февраль куни соат 09:05 да Жиззах шаҳар «Саноат А» ҳудудида жойлашган Master Building Products пластмасса қувурлари ишлаб чиқариш қўшма корхонаси ҳудудида жойлашган компрессор биносида ёнғин юзага келгани тўғрисида ёнғин-қутқарув хизматига хабар келиб тушган.
«Хабар асосида воқеа жойига ёнғин ўчириш экипажлари соат 09:10 да етиб борган, ёнғин соат 09:18 да ўраб олиниб, 09:40 да тўлиқ ўчирилган», — дейилади хабарда.
Ёнғин оқибатида бинонинг тахминан 90 квадрат метр майдонида шифт қисми ҳамда ускуналар ёнган. Олиб борилган ҳаракатлар натижасида ишлаб чиқариш цехининг 1400 квадрат метр майдони ёнғиндан сақлаб қолинган.
Тан жароҳати олганлар ва ҳалок бўлганлар қайд этилмаган. Ҳозирда ёнғин сабаби ва моддий зарар миқдори аниқланмоқда.
Аввалроқ Нукусда эшик ишлаб чиқариш цехида ёнғин юз бергани, Намангандаги хонадонда рўй берган ёнғин бир соатдан сўнг бартараф этилгани, Фарғонадаги озиқ-овқат дўконида ёнғин келиб чиққани, Гулистондаги «Эски бозор» ҳудудида жойлашган қассобхонада ёнғин чиққани ҳақида хабар берилган эди.
Изоҳ (0)