АҚШнинг Хитой билан савдо уруши ўн йил ичида АҚШ иқтисодиётига триллион доллардан кўпроқ зарар етказиши мумкин. Бу ҳақда АҚШ Савдо-саноат палатаси ҳисоботида маълум қилинди, деб ёзмоқда «Korrespondent.net».
Экспертлар Хитой товарлари учун бож миқдорини 25 фоизга ошириш АҚШ учун йилига 190 миллиард долларга тушишини ҳисоблаб чиқди. Хитойга тўғридан-тўғри инвестицияларни камайтириш оқибатида АҚШ ялпи ички маҳсулоти 500 миллиард долларга қисқаради. Америкалик инвесторлар ҳар йили 25 миллиард долларга камроқ даромад олади.
Таъкидланишича, Америка корхоналарининг Хитой бозоридан чиқарилиши узоқ муддатли истиқболда АҚШнинг глобал етакчилигига янада жиддий таъсир қилиши мумкин. Савдо палатаси маълумотларига кўра, Америка корхоналари глобал рақобатбардошлигини йўқотиши мумкин.
Маълумот учун АҚШ ва Хитой ўртасидаги савдо уруши 2017 йил охирида бошланган. 2020 йил бошида томонлар сулҳнинг «биринчи босқичи» тўғрисида битим имзолади, аммо кейинчалик пандемия сабабли музокаралар тўхтаб қолди.
Аввалроқ АҚШ давлат котиби Энтони Блинкен Хитой билан муносабатларни АҚШ учун энг муҳим деб атаган эди. Унинг сўзларига кўра, айни пайтда икки давлат тобора душманга айланиб бормоқда.
2021 йилнинг январь ойи бошида Дональд Трамп администрацияси Хитойнинг 10 та компаниясини «қора рўйхат»га киргизгани, улар орасида Xiaomi компанияси ҳам борлиги хабар қилинганди.
Изоҳ (0)