Венесуэлада тиббиёт ходимлари маҳаллий аҳолини коронавирусга қарши Россияда ишлаб чиқарилган «Спутник V» вакцинаси билан эмлашни бошлади. Бу ҳақда мамлакат президенти Николас Мадуро Twitter’да маълум қилди, деб ёзмоқда «РБК».
«Биринчи бўлиб ‘Спутник V’ вакцинаси билан Миранда штатида яшовчи Гленди Риверо исмли ёш шифокор эмланди», — деб ёзган давлат раҳбари. Мадуро буни «барча венесуэлаликларга чексиз қувонч ва умид бахш этган ажойиб лаҳза» деб атади.
2020 йил ноябрь ойида Венесуэлада «Спутник V» синовдан ўтказилган. Синовда 2 минг киши, шу жумладан, президентнинг ўғли Мадуро Герра ва унинг опаси Мария Тереза иштирок этган. Синовлардан сўнг Венесуэла ҳукумати Россия тўғридан-тўғри инвестиция жамғармаси (РФПИ) билан мамлакатга 10 миллион дозали вакцина етказиб бериш юзасидан келишув олиб борган. Шартнома 2020 йил 29 декабрь куни имзоланган. 30 декабрь куни Мадуро 90 кун ичида мамлакатнинг 10 миллион фуқаросини эмлашга ваъда берган.
Президентнинг таъкидлашича, биринчи бўлиб шифокорлар эмланади, улардан кейин ўқитувчилар ва «Биз — Венесуэла» ҳаракати аъзолари вакцина қабул қилиши мумкин.
Аввалроқ Мўғулистон Соғлиқни сақлаш вазирлиги «Спутник V» вакцинасини тезлаштирилган процедура бўйича рўйхатдан ўтказган эди.
Шунингдек, Ўзбекистонда «Спутник V» вакцинасини учинчи босқич клиник синовлари натижалари асосида сертификатлаштирилган ҳолда оммавий қўллашга рухсат берилган. Ўзбекистонда коронавирусга қарши эмлаш март ойининг биринчи ярмида бошланиши маълум қилинган.
Маълумот учун, шу вақтгача «Спутник V» вакцинаси Венгрия, Ливан, Серб Республикаси, Жазоир, Аргентина, Беларусь, Боливия, БАА, Сербия, Фаластин, Парагвай, Покистон, Туркманистон ва Эронда фойдаланиш учун тасдиқланган.
Изоҳ (0)