Туркия ва Швейцарияда март ойидан бошлаб COVID-19 чекловлари юмшатилади
Туркия ва Швейцария ҳукумати коронавирус сабаб ўрнатилган чекловларни март ойидан бошлаб юмшатмоқчи.
Туркияда коронавирус сабаб жорий қилинган чекловлар юмшатилади, дея хабар бермоқда «РИА Новости».
Қайд этилишича, Туркияда чеклов чоралари март ойидан бошлаб, эпидемиологик вазиятга қараб, босқичма-босқич юмшатилади. Бу ҳақда мамлакат президенти Ражаб Тоййиб Эрдўғон 17 февраль, чоршанба куни маълум қилган.
Туркияда иш кунлари соат 21:00 дан 05:00 гача, жума куни соат 21:00 дан душанба соат 05:00 гача комендантлик соати амалда. Бундан ташқари, Туркияда жамоат жойларида ниқоб тақиш режими ва ижтимоий масофани сақлаш қоидалари мавжуд. Ресторанлар, кафелар, тунги клублар ва бошқа кўнгилочар муассасалар ёпиқ, умумий овқатланиш шохобчаларида эса фақат етказиб бериш ва ўзи билан олиб кетиш хизмати мавжуд.
«Коронавирусга қарши курашнинг динамикаси ва ютуқларимизга асосланиб, март ойининг бошида биз чекловларни босқичма-босқич олиб ташлашни бошлаймиз. Минтақаларни хавф даражасига қараб тўрт тоифага ажратамиз.
Дам олиш кунидаги комендантлик соати босқичма-босқич бекор қилинишидан бошлаб, ҳар бир вилоятда ушбу тоифалар учун алоҳида қарорлар қабул қилинади», — деди Эрдўғон журналистларга.
Унинг қўшимча қилишича, яқин кунларда ресторан, кафе ва бошқа овқатланиш шохобчаларини очиш бўйича йўл харитаси жамоатчиликка маълум қилинади.
Унинг сўзларига кўра, Туркияда аллақачон 5,5 миллиондан ортиқ одам коронавирусга қарши эмланган.
Бундан ташқари, «Известия»нинг хабар беришича, Швейцария ҳукумати 1 мартдан бошлаб коронавирус инфекцияси туфайли қўйилган чекловларни юмшатади. Бу ҳақда 17 февраль, чоршанба куни мамлакат ҳукумати сайтида хабар берилди.
Дўконлар, музейлар, кутубхоналарни очиш, шунингдек, одамларнинг спорт ва кўнгилочар муассасаларга ташриф буюришига рухсат бериш режалаштирилган.
«Энг кўпи билан 15 кишидан иборат шахсий тадбирлар яна очиқ ҳавода ўтказилиши мумкин. 18 ёшгача бўлган ёшлар яна кўпгина спорт ва маданий тадбирлардан фойдаланиш имкониятига эга бўлишлари керак», — дейилади ҳукумат хабарида.
Таъкидланишича, чекловларни юмшатиш бўйича якуний қарор федерал кенгаш томонидан 24 февраль куни кантон (штат)лар билан маслаҳатлашгандан сўнг қабул қилинади.
Аввалроқ Исроил карантин чекловларини юмшатишни бошлаши ҳамда Германия карантин чекловларини 7 мартгача узайтиргани ҳақида хабар берилганди.
