АҚШ Адлия вазирлиги Шимолий кореялик уч нафар дастурчини оммавий хакерлик ҳужумини уюштириб, 1,3 миллиард доллар қийматга эга пул маблағи ва криптовалюта ўғирлаганликда айблади, деб хабар бермоқда Reuters. Ҳужум банклардан тортиб Голливуд киностудияларини ўз ичига олувчи бир қатор компанияларга уюштирилган.
Айблов хулосасида айтилишича, 31 ёшли Жон Чанг Ҳёк, 27 ёшли Ким Ил ва 36 ёшли Пак Жин Ҳёк ҳужумни уюштириш вақтида Шимолий Корея ҳарбий разведка хизматига ишлаган.
АҚШ Адлия вазирлигига кўра, хакерлар кенг кўламдаги жиноий ҳаракатлар ва шов-шувли киберҳужумлар учун жавобгар, шу жумладан, 2014 йил ноябрида КХДР етакчисининг ўлдирилиши тасвирланган «Интервью» комедиясига жавобан Sony Pictures Entertainment студиясига уюштирилган ҳужум ҳам уларнинг иши бўлиши мумкин.
Шунингдек, иддао қилинишича, улар WannaCry 2.0 товламачи дастурни яратишда иштирок этган, у 2017 йил майида ишга туширилган ва айниқса, Буюк Британия Соғлиқни сақлаш миллий хизматига катта зарар етказган.
Хакерлар, шунингдек, 2018—2020 йилларда Жанубий ва Жануби-шарқий Осиё, Мексика ва Африкадаги банкларга SWIFT протоколини суиистеъмол қилиш ҳамда зарарли дастурларни ишга тушириш орқали ҳужумлар уюштиришда айбланмоқда.
«Эълон қилинган айблов материалларида айтилишича, хакерлар қурол ўрнига клавиатурадан фойдаланиб, пул солинган қоплар ўрнига электрон ҳамёнлар ва криптовалюта ўғирлаган. Бу хакерлар бугунги кунда дунёдаги энг йирик ‘банк ўғрилари’дир», — деди АҚШ бош прокурори ёрдамчиси Жон Демерс.
АҚШ Адлия вазирлиги қайд этишича, хакерлар нафақат КХДР ҳудудида, балки бошқа мамлакатлар, жумладан, Хитой ва Россия ҳудудида туриб ҳам ишлаган. Вазирлик келтирилган сумманинг қанча қисмини хакерлар ўғирлашга муваффақ бўлганига аниқлик киритмади.
Шунингдек, хабарларга кўра, АҚШ ва Канада фуқаролигига эга бир шахс хакерлар томонидан ўмарилган пулнинг бир қисмини «ювиш»да ўзини айбдор деб тан олган.
Аввалроқ Шимолий кореялик хакерлар коронавирусга қарши вакцинага оид маълумотларни олиш учун Pfizer фармацевтика компаниясининг серверларига киришга урингани ҳақида хабар берилган эди.
Изоҳ (0)