АҚШ Жаҳон соғлиқни сақлаш ташкилоти (ЖССТ)ни ислоҳ қилиш ҳамда огоҳлантириш тизимини такомиллаштириш бўйича шериклар билан ҳамкорлик қилишга содиқдир. Бу ҳақда 17 февраль, чоршанба куни бўлиб ўтган коронавирус пандемиясига қарши кураш бўйича кўрилган чоралар тўғрисидаги БМТ Хавфсизлик Кенгаши йиғилишида АҚШ давлат котиби Энтони Блинкен маълум қилди, дея хабар бермоқда «ТАСС».
«Биз ЖССТни мустаҳкамлаш ва ислоҳ қилиш, соғлиқни сақлашнинг глобал кун тартибини қўллаб-қувватлаш, биологик таҳдидларга қарши турғунликни шакллантириш, тезкор жавоб беришимизга имкон берадиган огоҳлантириш тизимини яратиш бўйича бутун дунё бўйлаб ҳамкорлар билан ишлаймиз, бу одамлар ҳаётини сақлаб қолиш учун зарур», — деди АҚШ давлат котиби.
Давлат котиби коронавирусни енгиш ва келажакда содир бўладиган пандемияларнинг олдини олиш учун соғлиқни сақлашнинг энг мустаҳкам тузилишини яратиш зарурлигини таъкидлади.
Унинг қўшимча қилишича, Қўшма Штатлар февраль ойининг охирига қадар ЖССТ бюджетига, тахминан, 200 миллион доллар қўшади.
«Қўшма Штатлар молиявий мажбуриятлари доирасида ЖССТга ой охирига қадар қарийб 200 миллион доллар ўтказмоқчи», — деди Давлат департаменти раҳбари.
У ушбу қарорни пандемияга қарши глобал жавоб чораларини кўрувчи ЖССТни қўллаб-қувватлаш бўйича АҚШнинг мажбуриятини акс эттирувчи муҳим қадам деб атади.
Эслатиб ўтамиз, 2020 йил апрелда Трамп коронавирус пандемияси бошлангани учун Жаҳон соғлиқни сақлаш ташкилоти (ЖССТ)ни жавобгар қилди. АҚШнинг ўша вақтдаги президенти фикрича, ташкилот вирус Хитойда пайдо бўлганидан кейин унинг дунё бўйлаб тарқалишига йўл қўймаслик вазифасини бажара олмаган. Ўшандаёқ Трамп АҚШ томонидан ЖССТга бериладиган молиявий ёрдамни музлатиб қўйди, шунгача АҚШ ташкилотнинг энг йирик донори бўлиб, бюджетининг, тахминан, 15 фоизини таъминлаб берган.
Американинг амалдаги президенти Жо Байден инаугурациядан бир неча соат ўтгач, АҚШни ЖССТга қайтариш тўғрисидаги фармонни имзолади.
Изоҳ (0)