Германия мамлакатига ишлаш учун 500 нафар Ўзбекистон фуқароси танлов асосида юборилади, дея хабар бермоқда Миграция агентлиги.
Қайд этилишича, хорижда ишлаш истагида бўлган ўзбекистонликлар чет элда хавфсиз, тартибли ва қонуний меҳнат билан банд бўлиши ҳамда дунёнинг ривожланган давлатларида муносиб иш ўринларига жойлаштирилиши чоралари кўрилмоқда.
Бу борада Германиянинг ваколатли ташкилотлари билан келишувга эришилиб, дастлаб 500 нафарга яқин Ўзбекистон фуқароларини «GfM Gruppe» агентлиги орқали ушбу давлатда тиббиёт, қурилиш, йўлсозлик, информацион технологиялари, логистика, қарияларни парвариш қилиш, металл конструкциялари ва бошқа техник соҳаларда меҳнат фаолиятини амалга ошириши учун ташкилий тартибда юбориш кўзда тутилмоқда.
Шу муносабат билан, Германияда дастлаб дуал тизимида, яъни бир пайтнинг ўзида касб ўрганиш ва ҳақ тўланадиган ишга, кейинчалик тўлиқ ишга жалб қилиш мақсадида иш берувчиларнинг талабларига тўғри келадиган номзодларни аниқлаш ва уларнинг базасини шакллантириш учун Ўзбекистон фуқаролари таклиф этилади.
Номзодларга қуйидагича талаблар қўйилади:
- 18-27 ёшгача бўлиши;
- мактаб, лицей ёки касб-ҳунар коллежини тамомлаган бўлиши;
- немис тилини камида Б1, яъни мустақил мулоқот қилиш даражасида билиши;
- Германияда камида 3 йил муддат давомида меҳнат фаолиятини амалга оширишга тайёр бўлиши;
- одамларга нисбатан очиқкўнгил ва тез мулоқотга киришувчан бўлиши;
- соғлом ва судланмаган бўлиши лозим.
Агар номзод амалиётдан муваффақиятли ўтмаса ёки касб ўрганишни давом эттириш учун мос келмайдиган деб ҳисобланса, у ўз маблағлари ёки суғурта харажатлари ҳисобидан Ўзбекистонга қайтарилади.
Германияда ишлаш истагида бўлган фуқаролар Ташқи меҳнат миграцияси агентлигига мурожаат қилишлари мумкин.
Қўшимча маълумотларни 1282 қисқа ёки 71 202-33-55, 71 200-00-61 телефон рақами орқали олиш мумкин.
Бундан аввал Ўзбекистондан Канадага меҳнат мигрантлари юборилиши режалаштирилаётгани, ўзбекистонликлар Саудия Арабистонига ишлагани юборилиши мумкинлиги ҳамда Ўзбекистонда хорижга чиқиш паспорти учун тўлов миқдорини камайтириш таклифи берилиши ҳақида хабар берилганди.
Изоҳ (0)