Бухоро шаҳрида яшовчи 49 ёшли Р.С. алиментдан қарздорлик эвазига фарзандларига Nexia-2 ҳамда икки хонали квартирасини ҳадя қилди. Бу ҳақда «Дарё»га МИБ вилоят бошқармаси ахборот хизмати раҳбари Илҳом Турсунов хабар берди.
Таъкидланишича, фуқаро Р.С. оилавий ажримдан сўнг узоқ йиллар давомида фарзандлари таъминоти учун тўланиши лозим бўлган алимент пулини тўлашдан бўйин товлаб, Россияда ишлаб юрган. Унга бир неча бор огоҳлантиришлар берилган бўлишига қарамасдан, у фарзандларидан умуман хабар олмаган.
Аниқланишича, фуқаро биринчи фарзанди учун айни кунга қадар 13 миллион сўм алимент тўловини амалга ошириши лозим бўлган. Иккинчи фарзанди учун эса 18 ёшга тўлгунга қадар умуман алимент тўламаган. Шу сабаб унга нисбатан қидирув эҳтиёт чораси қўлланилган. Шундан сўнг Р.С.нинг номида бўлган Nexia-2 автомашинаси жарима майдончасига келтирилган. Ва ўн кунлик муддат ичида қарздорлик бартараф этилмаса, автомашинани реализация қилиш ҳақида огоҳлантирилган.
Мазкур воқеалардан сўнг қарздор ота машинаси ва икки хонали уйини ўзаро нотариал келишув асосида фарзандларига ҳадя қилган.
Изоҳ (0)