Ҳукуматнинг 16 февралдаги қарори билан Ўзбекистон ҳудудига олиб кириш ва республика ҳудудидан олиб чиқишда экологик хавфли маҳсулотлар ва чиқиндиларни мажбурий экологик сертификатлаштириш тартиби тўғрисидаги низом тасдиқланди, деб хабар бермоқда Адлия вазирлиги матбуот хизмати.
Низомга кўра, экологик хавфли маҳсулотлар ва чиқиндиларни Ўзбекистонга олиб кириш ва олиб чиқиш Экология ва атроф-муҳитни муҳофаза қилиш давлат қўмитаси тизимидаги аккредитациядан ўтган экологик сертификатлаш органи томонидан бериладиган экологик сертификат асосида амалга оширилади.
Ушбу сертификатни олиш учун ариза берувчи «Ягона дарча» божхона ахборот тизими орқали ёки тўғридан-тўғри Давлат экология қўмитаси тизимидаги экологик сертификатлаш органига ариза билан мурожаат қилиши лозим.
Экологик сертификатлаш органи бир иш куни мобайнида тақдим этилган ҳужжатларни таҳлил қилади ва ҳужжатлар тўлиқ бўлганда экологик хавфли маҳсулотлар ва чиқиндиларни сертификатлашни амалга ошириш тўғрисида қарор қабул қилади.
Экологик сертификат:
- олиб кирилаётган экологик хавфли маҳсулотлар ва чиқиндиларга (транспорт воситаларидан ташқари) аниқ ҳажми (сони) кўрсатилган битта ташқи савдо шартномаси (контракти) ва етказиб берувчи ҳамда қабул қилувчи ўртасида тузилган келишув(лар) нусхасига асосан — бир йилдан ошмаган муддатга;
- экологик хавфли маҳсулотлар ва чиқиндиларнинг ҳар тўпига — бир йилдан ошмаган муддатга;
- маҳсулотларни сериялаб ишлаб чиқариш жараёнларига эса 3 йил муддатга берилади.
Илгари экологик хавфли маҳсулотлар фақат Вазирлар Маҳкамаси томонидан тасдиқланган номенклатурага мувофиқ экологик сертификатлаштириларди. Аввалги тартиб ўз кучини йўқотди.
Изоҳ (0)