«Мен кўпроқ оддий одамлар билан гаплашсам, сизларнинг ниятларингизни билсам дейман». Президент маҳалла нуронийлари билан суҳбат қилди

Шавкат Мирзиёев «Даштбоғ» кичик саноат зонасидаги корхоналарни кўрганидан кейин маҳалладаги шароитларни кўздан кечирди, дея хабар бермоқда Президент матбуот хизмати.

Исмоил Киргизов ва Малика Парпиева хонадонида бўлиб, улар билан суҳбатлашди. Гурунгга қўни-қўшнилар ҳам келди.

«Мен кўпроқ оддий одамлар билан гаплашсам, сизларнинг кўзларингизга қарасам, ниятларингизни билсам дейман», — деди Шавкат Мирзиёев.

Нуронийлар маҳалла тизимига эътибор натижасини ўз ҳаётлари мисолида сўзлаб берди. Ижтимоий муаммолар ҳал бўлиб, турмуш шароитлари яхшиланаётганини айтди.

«Нима учун ҳамма кучни маҳаллага ташлаяпмиз. Марказдаги битта кўчани ёритиб қўйганимиз билан одамлар рози бўлмайди-ку. Маҳаллалардаги одамларимиз, аёлларимиз, жонажон ёшларимизни ким эшитади?!

Наманган вилоятида ҳам 141 та маҳаллада муаммолар бор — қаерда йўл йўқ, қаерда сув йўқ, қаерда ишсизлик кўп. Ушбу камчиликларни билиб, ҳис қилиб, катта маблағ билан келганмиз. Энди уни ким назорат қилади, ким халқни ўйлайди? Маҳалла, жамоатчилик. Энди маҳалла раиси янгиликка интилган, одамларнинг оғирини енгил қиладиган бўлиши керак», — дея таъкидлади Шавкат Мирзиёев.

«Даштбоғ» маҳалласи идораси, Давлат хизматлари маркази филиали кўздан кечирилди.