Баҳор яқинлашиши билан нафис, енгил, бежирим кўйлакларга талаб ортади. Ушбу мавсумда янги кўриниш ҳосил қилишнинг энг осон йўли чиндан ҳам кийим-кечакдир. Нақшли либослар эса образни бойитишда янада кўпроқ ёрдам беради.
Гулли нақшлар
Гулли либослар чиндан ҳам бежиримлиги билан барча кўйлаклардан ажралиб туради. Шунингдек, ҳар қандай аёл улардан ўзига мосини танлаши мумкин. Катта, кичик ёки ўртача каби. Баҳор фаслида дизайнерлар кўпроқ гулли либосларга мурожаат қилишни тавсия этади. Бу ҳам ташқи кўринишга, ҳам кайфиятга ижобий таъсир ўтказади.
Бундан ташқари, гулли либослар ўзида қарама-қаршиликни ҳам ифодалайди. Масалан, оқ фонда қора гуллар ёки бошқа рангдагиси бўлиши мумкин. Айтганча, гулли нақшлар фақатгина либосларда эмас, балки сумка, пойабзал ёки енгил шарфларда ҳам бўлиши образни тўлдиради.
Капалак ёки патли нақшлар
Кўклам учун капалак ҳамда пат сурати туширилган юбка ва кофталарни ҳам танлаш мумкин. Уларни чарм курткалар билан уйғунлаштириш эса айни мавсумда урфда. Шунингдек, ранглардан оч кўк, пушти, қаймоқранг либослар баҳорий кайфият улашади.
Нўхат
Кўпчилик нўхат босмали либослар шайдоси. Ушбу нақш узоқ вақтлардан буён урфдан қолмай келмоқда. Аммо унинг ҳам ўзига яраша шартлари бор. Бўйи паст ҳамда тўладан келган қизлар майда шаклдагиси, аксинча жуда озғинларга эса йирик нўхат нақшли либослар версияси таклиф этилади.
Абстракция
Мураккаб тасвирлар билан романтик услуб яратувчилар учун абстракция тасвири туширилган либослар мос келиши шубҳасиз. Фақат нақшлар енгил ва ранг жиҳатидан очроқ бўлиши керак. Бу каби услубда нақшларнинг чизиғи аниқ бўлиши шарт эмас, балки ноаниқ тасвир нақш таъсирини кучайтиришга ёрдам беради. Умуман олганда, бу каби босма нақшли ҳар қандай кийимни кийиш мумкин.
Тўртбурчак
Кўпчилик одамлар тўртбурчакни жуда расмий деб билади. Аммо барчаси танланган нақшга боғлиқ. «Виши» тўртбурчак нақшларнинг энг романтик турларидан бири ҳисобланади. Катталиги ўртача ва шакли нафис бўлганлари қоматнинг нозик хусусиятларини таъкидлайди. Албатта, бошқа турдаги тўртбурчаклар ҳам романтик кўринишга эга бўлиб, барчаси мато ранги ва тузилишига боғлиқ.
Юракчалар
Кўйлак, юбка, кофталарда юракча тасвири гардеробга романтикани олиб кириши табиий. Ўта бачкана бўлмаслик учун юракча нақшли либосларни шунчаки нейтрал нарсалар билан бойитиш мумкин. Образ мукаммал бўлиши учун баланд пошнали туфли ва аксессуарларга эътибор бериш лозим.
Изоҳ (0)