Тошкент марказидаги Абай кўчасига туташ 13-мавзеда, 11 ва 13-уйлар оралиғида кетаётган қурилиш ишлари тўхтатилди. Тез кунларда қазилган котлован кўмилиб, ўрнида болалар ўйин майдончалари қурилади. Бу ҳақда «Kun.uz» хабар қилди.
Тошкент шаҳри Шайхонтоҳур туманидаги 13-мавзеда жойлашган иккита беш қаватли уйларнинг ўртасидаги 20 сотихли бўш ерда амалдаги Шаҳарсозлик нормалари кодекси талабларига зид равишда бунёд этилаётган кўп қаватли уй қурилиши тўхтатилди.
Тошкент шаҳар ҳокимининг ер ажратиш тўғрисидаги қарори бекор бўлиши кутилмоқда.
Маълум бўлишича, 16 февраль куни Шайхонтоҳур туман прокуратураси, туман ҳокимлиги ва ИИБ вакиллари қурилиш ишларидан норози бўлаётган аҳоли билан учрашган.
Шайхонтоҳур тумани ҳокимининг қурилиш масалалари бўйича ўринбосари Беҳруз Ҳакимовнинг маълум қилишича, тадбиркорга мазкур ҳудуддан ер ажратиш тўғрисидаги Тошкент шаҳар ҳокимининг қарори бекор бўлиши кутилмоқда.
«Аҳолининг норозилиги сабаб қурилиш ишлари тўхтатилди. Тошкент шаҳар ҳокимининг қарори юридик жиҳатдан бекор қилинишини кутяпмиз. Чунки бу туманнинг ваколатига кирмайди.
Шаҳар ҳокимининг қарори бекор бўлиши билан ҳудудда қазилган жойлар қурувчи томонидан тўлдирилиб, атрофи ўраб олинган тўсиқлар олиб ташланади ва ҳудуд ободонлаштирилади. Мазкур бўш ер майдонида шаҳар ҳокимининг топшириғи билан болалар майдончаси ва спорт майдончалари қурилади», — деди Беҳруз Ҳакимов.
Бундан аввал Тошкентда бир қатор кўп қаватли турар жой бинолари ноқонуний қурилаётгани аниқланса-да, қурилиш ишлари тўхтатилмагани маълум қилингани, Нукусда камчилиги аниқланган кўп қаватли уйнинг девори бузиб ташлангани ҳамда Фарғонада кўп қаватли турар жойлар ўртасида барча қурилишлар тўхтатилиб, болалар ва спорт майдончалари қайта тикланиши ҳақида хабар берилганди.
Изоҳ (0)