Мьянмада қўлга олинган давлат маслаҳатчисига нисбатан иккинчи айблов эълон қилинди

Мьянмадаги ҳуқуқ-тартибот идоралари ҳарбий тўнтариш вақтида ҳибсга олинган давлат маслаҳатчиси Аун Сан Су Чжига қарши 16 февраль, сешанба куни иккинчи айбловни эълон қилди. Бу ҳақда айбланувчининг адвокати берган маълумотларга асосланиб «Интерфакс» хабар берди.

Адвокатнинг сўзларига кўра, эндиликда Аун Сан Су Чжи фавқулодда вазиятлар тўғрисидаги қонунни бузганликда айбланмоқда. Биринчи марта 3 февраль куни давлат маслаҳатчиси импорт ва экспорт тўғрисидаги қонунни бузганликда айбланган эди. Чунки унинг уйида ўтказилган тинтувлар давомида мамлакатга ноқонуний олиб кирилган радиоэлектрон воситалар топилган.

Адвокатнинг таъкидлашича, Аун Сан Су Чжи коронавирус тарқалиши билан боғлиқ чекловлар туфайли судда видеоконференцалоқа воситасида қатнашган, аммо адвокатларга рухсат берилмагани учун улар судда иштирок эта олмаган.

Давлат маслаҳатчисининг соғлиғи тўғрисидаги саволларга адвокат шундай жавоб берди: «Ҳеч қандай янгилик йўқлигининг ўзи яхши янгилик. Ҳозирча ёмон хабар эшитмадик». Унинг қўшимча қилишича, кейинги суд мажлиси 1 мартга белгиланди. Хабарга кўра, айни пайтда мамлакатда ўтказилаётган намойишларда асосий талаб Аун Сан Су Чжини озод қилиш ҳақида бўлмоқда.

Шунингдек, 3 февраль куни мамлакат президенти Вин Мьинга қарши фавқулодда вазиятларда ҳаракат қилиш тўғрисидаги қонунни, хусусан, COVID-19’га қарши кураш қоидаларини бузганлик тўғрисида айблов эълон қилинганди.

Маълумот учун, 1 февраль куни Мьянма ҳарбийлари мамлакатда ҳокимиятни қўлга киритганини эълон қилди, улар мамлакат президенти ва бошқа юқори мартабали амалдорларни 2020 йил 8 ноябрда бўлиб ўтган «сайловдаги фирибгарликлар»ни текширмаганликда айблаб, ҳибсга олди. Қуролли Кучлар бош қўмондони Мин Аунг Хлайн мамлакатнинг муваққат президенти этиб тайинланди ва мамлакатда бир йил муддатга фавқулодда ҳолат жорий этилди.

Мьянма аҳолиси 6 февраль куни Янгон кўчаларига чиқиб, ҳарбийлар томонидан ҳокимият эгаллаб олинишига қарши чиқди. Мамлакатда оммавий норозилик ва иш ташлашлар бошлангач, Транспорт ва коммуникацияларни ривожлантириш вазирлиги 14 февраль, якшанба куни уяли алоқа операторларига интернетга киришни тақиқлашни буюрди. Натижада, 15 февраль куни эрталаб саккиз соат давомида тармоққа кириш имконсизлигича қолди. Аммо кейинчалик интернет алоқаси тикланди.

Аввалроқ Мьянма ҳокимияти тепасига келган ҳарбийлар норозилик намойишлари туфайли кўчаларга зирҳли техникаларни жойлаштираётгани ҳақида хабар берилганди.