Myanmadagi huquq-tartibot idoralari harbiy to‘ntarish vaqtida hibsga olingan davlat maslahatchisi Aun San Su Chjiga qarshi 16-fevral, seshanba kuni ikkinchi ayblovni e’lon qildi. Bu haqda ayblanuvchining advokati bergan ma’lumotlarga asoslanib “Interfaks” xabar berdi.
Advokatning so‘zlariga ko‘ra, endilikda Aun San Su Chji favqulodda vaziyatlar to‘g‘risidagi qonunni buzganlikda ayblanmoqda. Birinchi marta 3-fevral kuni davlat maslahatchisi import va eksport to‘g‘risidagi qonunni buzganlikda ayblangan edi. Chunki uning uyida o‘tkazilgan tintuvlar davomida mamlakatga noqonuniy olib kirilgan radioelektron vositalar topilgan.
Advokatning ta’kidlashicha, Aun San Su Chji koronavirus tarqalishi bilan bog‘liq cheklovlar tufayli sudda videokonferensaloqa vositasida qatnashgan, ammo advokatlarga ruxsat berilmagani uchun ular sudda ishtirok eta olmagan.
Davlat maslahatchisining sog‘lig‘i to‘g‘risidagi savollarga advokat shunday javob berdi: “Hech qanday yangilik yo‘qligining o‘zi yaxshi yangilik. Hozircha yomon xabar eshitmadik”. Uning qo‘shimcha qilishicha, keyingi sud majlisi 1-martga belgilandi. Xabarga ko‘ra, ayni paytda mamlakatda o‘tkazilayotgan namoyishlarda asosiy talab Aun San Su Chjini ozod qilish haqida bo‘lmoqda.
Shuningdek, 3-fevral kuni mamlakat prezidenti Vin Myinga qarshi favqulodda vaziyatlarda harakat qilish to‘g‘risidagi qonunni, xususan, COVID-19’ga qarshi kurash qoidalarini buzganlik to‘g‘risida ayblov e’lon qilingandi.
Ma’lumot uchun, 1-fevral kuni Myanma harbiylari mamlakatda hokimiyatni qo‘lga kiritganini e’lon qildi, ular mamlakat prezidenti va boshqa yuqori martabali amaldorlarni 2020-yil 8-noyabrda bo‘lib o‘tgan “saylovdagi firibgarliklar”ni tekshirmaganlikda ayblab, hibsga oldi. Qurolli Kuchlar bosh qo‘mondoni Min Aung Xlayn mamlakatning muvaqqat prezidenti etib tayinlandi va mamlakatda bir yil muddatga favqulodda holat joriy etildi.
Myanma aholisi 6-fevral kuni Yangon ko‘chalariga chiqib, harbiylar tomonidan hokimiyat egallab olinishiga qarshi chiqdi. Mamlakatda ommaviy norozilik va ish tashlashlar boshlangach, Transport va kommunikatsiyalarni rivojlantirish vazirligi 14-fevral, yakshanba kuni uyali aloqa operatorlariga internetga kirishni taqiqlashni buyurdi. Natijada, 15-fevral kuni ertalab sakkiz soat davomida tarmoqqa kirish imkonsizligicha qoldi. Ammo keyinchalik internet aloqasi tiklandi.
Avvalroq Myanma hokimiyati tepasiga kelgan harbiylar norozilik namoyishlari tufayli ko‘chalarga zirhli texnikalarni joylashtirayotgani haqida xabar berilgandi.
Izoh (0)