Myanma davlat ma’muriy kengashi 23 314 mahbus, shu jumladan, 55 nafar chet ellik uchun amnistiya e’lon qildi. Bu haqda mamlakat Qurolli kuchlari bosh qo‘mondoni, katta general Min Aun Xlaynning bayonotiga tayanib, “TASS” xabar berdi.

Foto: EPA

“Myanmada tinchlik, taraqqiyot va tartib bilan yangi demokratik davlat yaratilayotgan paytda mahbuslarni namunali fuqarolarga aylantirish, jamoatchilikni xursand qilish uchun…. Davlat ma’muriyati kengashi, konstitutsiyaga muvofiq har qanday huquqbuzarliklar uchun 2021-yil 31-yanvarga qadar berilgan jazolarni afv etish to‘g‘risida farmon chiqardi”— deyiladi bayonotda.

Farmonga ko‘ra, o‘lim jazosi umrbod ozodlikdan mahrum qilishga, umrbod ozodlikdan mahrum qilish esa 40 yillik qamoq jazosiga almashtiriladi.

Ma’lumotlarga ko‘ra, Myanma harbiylari hokimiyat tepasiga kelganidan so‘ng 262 kishi hibsga olingan. Ayni paytda 241 kishi hibsda, ikki kishi qamoq jazosiga hukm qilingan. Bundan tashqari, harbiylar idoralar ishini harakatsizlantirish uchun hukumat amaldorlarini namoyishda qatnashishga undagan odamlarni javobgarlikka tortish bilan tahdid qilmoqda. Harbiylarning so‘zlariga ko‘ra, bo‘ysunmaslik harakatiga qo‘shilish uchun fuqarolarga tahdid va bosimlar o‘tkazilmoqda.

Shuningdek, AQSh Moliya vazirligi Myanmada yuzaga kelgan vaziyat tufayli mamlakatdagi o‘n nafar jismoniy va uchta yuridik shaxsga nisbatan bir tomonlama sanksiyalar joriy qilgani haqida xabar berildi.

Cheklov qo‘yilgan shaxslar qatorida birinchi vitse-prezident Myin Sve va mudofaa vaziri Seyn Vin bor, ular hokimiyat ag‘darilishdan oldin ushbu lavozimlarda ishlagan. Moliya vazirligi sanksiya e’lon qilganlarning Qo‘shma Shtatlardagi aktivlari muzlatiladi va ularga Amerika fuqarolari yoki kompaniyalariga aloqador shaxslar bilan biznes yuritish taqiqlanadi.

“Shuningdek, Myanma  harbiy kuchlari o‘z yo‘nalishini o‘zgartirmasa, biz qo‘shimcha choralar ko‘rishga tayyormiz. Agar tinch namoyishchilarga nisbatan zo‘ravonlik ortsa, Myanma harbiylari uchun bugungi sanksiyalar faqat boshlanishi bo‘ladi” — dedi AQSh moliya vaziri Janet Yellen.

Eslatib o‘tamiz, 1-fevral kuni Myanma harbiylari mamlakatda hokimiyatni qo‘lga kiritganini e’lon qildi, hukmron partiya rahbarlari va mamlakat prezidenti hibsga olindi. Qurolli kuchlar bosh qo‘mondoni Min Aung Xlayn mamlakatning muvaqqat prezidenti etib tayinlandi va mamlakatda bir yil muddatga favqulodda holat joriy etildi.

BMT bosh kotibi Antoniu Guterrish qurolli kuchlarning harakatlarini “Myanmada amalga oshirilgan demokratik islohotlarga jiddiy zarar yetkazish” deya qoraladi. Shuningdek, AQSh davlat kotibi Entoni Blinken Myanma davlat rahbarlarining hibsga olinishidan xavotir bildirdi va harbiylarni hibsga olingan siyosatchilarni ozod qilishga chaqirdi.