АҚШ президенти Жо Байден Конгрессни қурол олиб юришни тартибга солувчи қонунларни ислоҳ қилишга чақирди. Бу ҳақда Оқ уй расмий сайтида эълон қилинди, деб ёзмоқда «РБК».
«Бугун мен Конгрессни қурол-яроғ сотиш пайтида шахсни тасдиқловчи ҳужжат талаб қилиш, ҳужумга мўлжалланган ва ўқдони катта сиғимли қуролларни тақиқлаш, маҳсулотларини атайин кўча-кўйда тарқатаётган қурол ишлаб чиқарувчилар учун имтиёзларни бекор қилиш тўғрисидаги қонунларни ислоҳ қилишга чақираман», — дейилади президент баёнотида.
Оқ уй веб-сайтига жойлаштирилган Байденнинг мазкур мурожаати Флорида штатининг Паркленд шаҳридаги Marjory Stoneman Douglas мактабида бир йил олдин содир бўлган отишмага бағишланди. Ўшанда интизомни бузгани учун мактабдан четлатилган 19 ёшли собиқ ўқувчи таълим муассасасига ҳужум қилган, натижада 17 киши ҳалок бўлганди.
Шундан сўнг Флорида бу каби ҳодисаларнинг олдини олишга қаратилган қонун лойиҳасини маъқуллаган. Ҳужум учун мўлжалланган қуролларни сотиб олувчилар учун ёш чегараси аввалгидек 18 эмас, 21 қилиб белгиланган ҳамда ярим автоматик қуролларнинг отиш тезлигини оширувчи мосламаларни сотиш ҳам тақиқланган.
Қонун лойиҳасида, шунингдек, мактабларда соқчилар сонини кўпайтириш ва баъзи ўқитувчиларга қурол олиб юришга рухсат бериш таклиф қилинган.
Аввалроқ Оқ уй Жо Байденнинг Гуантанамодаги қамоқхонани ёпмоқчи эканлигини тасдиқлаган эди. Гуантанамо ҳарбий базасидаги халқаро террорчилар жазони ўтайдиган қамоқхона АҚШнинг собиқ президенти Жорж Буш томонидан 2001 йилдаги 11 сентябрь терактларидан сўнг терроризмда айбланган жиноятчиларни жазога маҳкум қилиш учун очилган.
Шунингдек, Жо Байден АҚШ қандай вазиятда ҳарбий кучдан фойдаланишини маълум қилганди. Президент олий бош қўмондон сифатида Америка халқи ва АҚШ иттифоқчиларининг ҳаётий муҳим манфаатларини ҳимоя қилиш учун куч ишлатишдан тортинмаслигини қайд этган.
Изоҳ (0)