16 февраль куни Ахборот ва оммавий коммуникациялар агентлигида Мудофаа вазирлиги вакиллари билан бўлиб ўтган матбуот анжуманида Ўзбекистондаги ҳарбий хизматчиларнинг хизмат қилиш тартибига киритилган баъзи ўзгартиришлар тўғрисида маълумот берилди.
«Олдин бошқа вилоят ҳарбий хизматчиси ўзининг вилоятида хизмат қилиши мумкин эмас эди. Президентнинг тегишли қарорига кўра, низомга ҳудудий тамойил деган тушунча киритилди. Баъзи бир лавозим ва мутахассисликларга ўз ҳудудида хизмат қилиш имкони яратилди. Шунингдек, аввал оилада ёлғиз фарзанд бўлса, туғилиб ўсган жойида хизмат қилиши мумкин эди. Ҳозир нафақат ёлғиз фарзанд, балки оилада ёлғиз ўғил бўлса ҳам, туғилиб ўсган ҳудудида хизмат қилиш ҳуқуқи берилди», — дейди Мудофаа вазирлиги кадрлар бош бошқармаси бошлиғи Шермуҳаммад Саидаҳматов.
Шунингдек, анжуман давомида сўнгги уч йил ичида Президент қарорлари билан тегишли дастурлар қабул қилиниши натижасида 2017—2020 йиллар давомида ушбу дастурлар доирасида қурилган уйлар ҳисобига 6215 нафар ҳарбий хизматчи, ҳарбий хизматдан резервга бўшатилган фуқаролар ва уларнинг оила аъзолари замонавий ва шинам турар жойлар билан таъминлангани маълум қилинди.
Таъкидланишича, 2017 йилгача бўлган давр мобайнида вазирлик тизимида турар жой таъминоти кўрсаткичи йилига 450 тадан ошмаган бўлиб, юқорида қайд қилинган давлат дастурлари асосида Тошкент шаҳри ва вилоятлар марказларида қурилиши амалга оширилган турар жойлар ҳисобига йилига ўртача 1500 дан ортиқ Мудофаа вазирлиги ҳарбий хизматчилари уй-жой билан таъминланиб келмоқда.
Хабарда айтилишича, бундан ташқари, 2018 йил 14 майдаги «Ўзбекистон Республикаси Қуролли Кучлари ҳарбийлари ва уларнинг оила аъзоларини ижтимоий қўллаб-қувватлашга оид қўшимча чора-тадбирлар тўғрисида»ги Президент қарорига асосан, ҳарбий хизматчиларнинг фарзандлари учун республика олий таълим муассасаларига 5 фоизлик давлат гранти асосида қабул квотаси ажратилди.
Изоҳ (0)