Коронавирусга қарши вакциналар COVID-19’нинг янги штаммлари пайдо бўлиши сабабли вақт ўтиб эскириши мумкин. «РБК»нинг Bloomberg’га таяниб хабар беришича, бу ҳақда 13 февраль, шанба куни Вашингтон университети вакцинологи Майкл Кинч маълум қилди.
Нашрнинг ёзишича, ҳозирда Буюк Британия, АҚШ ва коронавирусга қарши вакциналарни ишлаб чиқарган ҳамда чиқараётган бошқа давлатлар мутацияга учраган вирусдан самаралироқ ҳимоя қилиш учун вакциналарни янгилаш вариантларини изламоқда.
Майкл Кинчнинг айтишича, ҳозирда ишлаб чиқувчиларда вакциналарни «модернизация қилиш» учун барча имкониятлар мавжуд. Аммо препаратлар вирус мутациясига қарши етиб олиши учун вакцинани тезда ўзгартиришда муқобил ёндашувлар зарур. Хусусан, фармасевтика компаниялари соғлом ҳужайраларга кириш учун ишлатиладиган SARS-CoV-2 вирусининг бошоқли оқсилидаги ўзгаришларга тезда эътибор қаратишга ўрганиши лозим.
«Кўпчилигимизни хавотирга солаётган нарса мавжуд — вакциналар тўсатдан яроқсиз бўлиб қолиши эмас, улар аста-секин эскириб боришида», — деган Кинч.
Оксфорд университетида вакцина синовлари билан шуғулланувчи етакчи тадқиқотчи Эндрю Поллард ҳам шундай фикрда. Унинг айтишича, ичлаб чиқарувчилар коронавируснинг турли штаммларига муваффақиятли бардош берадиган универсал препаратни изламоқда. Бироқ компаниялар яқин ойларда айнан қандай мутациялар кенг тарқалишини ҳозирча билмайди.
«Биз ҳозир қандай мутациялар юз бераётганини тушуниб турибмиз. Аммо вирус одам иммунитети таъсири остида ўзгаришда давом этиши мумкин», — деб тушунтирган Поллард.
Ҳозир олимлар вакциналарни тез ўзгартиришнинг бир неча усулларини кўриб чиқмоқда. Улардан бири — мавжуд вакциналарни бирлаштириш. Бундай тадқиқотлар AstraZeneca томонидан Россиянинг Гамалея маркази, шунингдек, Американинг Pfizer компанияси билан ҳамкорликда олиб борилмоқда.
Bloomberg’нинг ёзишича, ўтган ҳафта Буюк Британия ҳукумати ва CureVac NV биофармасевтика компанияси COVID-19’нинг кейинги мутацияларини тахмин қилиш учун сунъий интеллектдан фойдаланиш бўйича қўшма лойиҳани эълон қилди.
Pfizer, Moderna ва Johnson & Johnson препаратлари самарадорлигини ошириш бўйича ишларни бошлаб юборган. AstraZeneca вируснинг янги штаммлари билан курашишга қодир вакцинанинг мослаштирилган версиясини кузга қадар тақдим этишни режалаштирмоқда.
Эслатиб ўтамиз, SARS-CoV-2 вирусининг янги штаммлари 2020 йилнинг декабридан бошлаб дунёнинг турли давлатларида тарқала бошлади. У, хусусан, Буюк Британия, Жанубий Африка, Бразилия, Японияда топилган. Февраль ойида Европа дори воситалари агентлиги (EMA) вакцина ишлаб чиқарувчилардан препаратларининг янги штаммга қанчалик самарадорли эканлигини ўрганиб, бу ҳақда хабар беришни топширган.
Изоҳ (0)