Porsche Taycan тезлик бўйича янги жаҳон рекордини ўрнатди (фото)

Porsche Taycan электроседани ўзи томонидан ўрнатилган дунё рекордлари қаторига яна битта натижани қўшиб қўйди. Пойгачи Лех Кин электрокарни Луизиана штатидаги кўргазма залида соатига 165,1 километр тезликка чиқариб, Гиннеснинг рекордлар китобидан жой олди, деб хабар беради Motor.

Рекорд Янги Орлеанда жойлашган Америкадаги энг катта конференц-марказда ўрнатилган. Силлиқланган бетон қуйилган бино майдони 93 минг квадрат метрга тенг. Автопойгачи конуслар билан белгиланган участкани босиб ўтиши ва бетон девор қаршисида тормозни босишга улгуриши керак эди. Қутқарув сеткаси ёки бошқа бирор ҳимоя воситасининг йўқлиги спортчининг хато қилишга ҳақи йўқлигидан далолат берган.

Рекордни ўрнатиш учун Лех Кин Porsche Taycan’нинг энг кучли модификацияси — Turbo S’ни танлаган. Моделга 71 от кучига эга мотор ва углерод-керамикли тормозлар ўрнатилган. Электрокар соатига 100 километр тезликка 2,8 сонияда эришади. 200 км/соат масофани модель 9,6 сонияда босиб ўтишга қодир. Эҳтиёт чораси сифатида автопойгачи суперкар шиналарини олдиндан қиздириб олган ва таваккалчиликка асосланган ҳаракатини бошлаган. Биринчи уринишдаёқ пойгачи Porsche Taycan Turbo S’ни соатига 165,1 километр тезликка чиқариб, янги рекорд ўрнатган.

Спортчининг сўзларига кўра, силлиқланган бетон устида ҳаракатланиш унга муз устидаги пойгани эслатиб юборган. Ёпиқ бинода ўрнатилган бундан олдинги рекорд 138,4 км/соатга тенг бўлиб, у 7 йилдан буён янгиланмай келаётганди.

Аввалроқ Porsche компанияси Британиянинг Brands Hatch Circuit трассасида Taycan 4S ва Turbo S серияли моделларини бардошлилик синовидан ўтказиб, 13 та рекорд ўрнатгани тўғрисида хабар берилганди.