2021 йилда Тошкент шаҳрида авиация боғи ташкил этилиши маълум қилинди (фото)

Тошкент шаҳар ҳокимлигида 8 февраль куни ўтказилган матбуот анжуманида пойтахт қиёфасини янада яхшилаш, кўкаламзорлаштириш ва аҳоли учун қўшимча ҳордиқ чиқариш масканларини яратиш бўйича ишлаб чиқилган 10 дан ортиқ лойиҳалар тақдим этилди. Бу ҳақда «Дарё» мухбири хабар бермоқда.

Тошкент шаҳар ҳокимининг биринчи ўринбосари Бахтиёр Раҳмоновнинг таъкидлашича, 2021 йил якунигача Тошкент халқаро аэропортидан 2,2 километр узоқликдаги майдонда авиация боғи ташкил этилади.

«Мазкур лойиҳа Тошкент шаҳри ва пойтахтликлар учун катта бир янгилик бўлиши шубҳасиз. Ушбу боғ ҳурматли шаҳар ҳокимимиз ташаббуси билан ташкил қилиняпти. Ҳаммаларингиз кўргансизлар, Миробод туманида поездлар музейи бор, яъни у ерда биринчи поезддан бошлаб, бугунги замонавий поездгача мавжуд. Авиация боғи ҳам худди шундай ҳолатда бунёд қилинади. У ерда самолётларнинг кўплаб турлари ўрин олади», — деди Раҳмонов.