Си Цзиньпин АҚШ ва Хитой ўртасидаги зиддиятни бутун дунё учун ҳалокат деб атади

АҚШ ва Хитой ўртасидаги низо бутун дунё учун ҳалокат бўлган бўларди, шунинг учун икки мамлакат музокараларни қайта бошлаши керак. Бу ҳақда Хитой Халқ Республикаси раиси Си Цзиньпин Америка президенти Жо Байден билан телефон суҳбати чоғида айтиб ўтди, деб ёзади «РБК».

«Ҳамкорлик — иккала халқ учун ягона тўғри танлов. Ҳамкорлик бизнинг мамлакатларимизга ва бутун дунёга катта натижаларга эришишда ёрдам беради, зиддият эса ҳалокатга айланиши аниқ», — деди Си Цзиньпин.

Унинг таъкидлашича, Вашингтон ва Пекиннинг кўп масалалар бўйича фикрлари ҳар хил, лекин томонлар бир-бирига ҳурмат билан муносабатда бўлиб қолиши ва муросага келишга ҳаракат қилиши керак. Келишмовчилик келтириб чиқараётган мавзулар сифатида у Тайван ва Гонконг масалаларини келтириб ўтди. Си Цзиньпин қайд этишича, АҚШ Хитой суверенитети билан боғлиқ масалаларга эҳтиёткорлик билан ёндашиши керак.

«Тайван, Гонконг ва Шинжон масалалари Хитойнинг ички ишлари ҳисобланади ҳамда унинг суверенитети ва ҳудудий яхлитлигига доирдир. АҚШ бизнинг мамлакат манфаатларини ҳурмат қилиши керак», — дея таъкидлади Хитой раиси.

Аввалроқ АҚШ президенти Жозеф Байден Хитой Халқ Республикаси раиси Си Цзиньпин билан биринчи марта телефон орқали мулоқот қилгани, музокаралар чоғида Байден Пекиннинг хатти-ҳаракатларидан хавотирда эканлигини билдиргани, хусусан, у Гонконг, Шинжон ва Тайвандаги вазиятларни тилга олгани хабар берилган эди. Бундан ташқари, Америка етакчиси америкаликларнинг хавфсизлиги, фаровонлиги, саломатлиги ва ҳаёт тарзини ҳимоя қилишга тайёр эканлигини айтиб, ўзининг бирламчи йўналишларидан бири сифатида эркин ва очиқ Ҳинд-Тинч океани минтақасини кўрсатиб ўтди.

АҚШ ва Хитой ўртасидаги муносабатлар Дональд Трампнинг президентлиги даврида ёмонлашди. 2017 йилдан бошлаб АҚШ Пекинга ва Хитой компанияларига қарши бир қатор санкциялар киритди. АҚШга олиб кириладиган Хитой товарлари учун оширилган бож тўловлари жорий қилинди, Пекин ҳам худди шундай чора билан жавоб қилди. Ўтган йил январида томонлар Хитойнинг АҚШдан сотиб олинадиган маҳсулотлар ҳажмини ошириши, Вашингтон эса бир қатор Хитой маҳсулотларига бож киритишни кечиктириши ҳақида келишиб олди. Бундан ташқари, Вашингтон Пекин ва Хитой компанияларини кўп марта Америка технологияларини ўғирлаганликда айблаган. Хитойнинг кўплаб технологик гигантлари «қора рўйха»ларга киритилган.