Президент Шавкат Мирзиёев 10 февраль куни бўлиб ўтган видеоселектор йиғилишида бош вазир ўринбосари, иқтисодий тараққиёт ва камбағалликни қисқартириш вазири Жамшид Қўчқоровга ва Давлат активларини бошқариш агентлиги директори Акмалхон Ортиқовга давлат улушлари мавжуд корхоналарни хусусийлаштириш жараёнларини тезлаштириш бўйича топшириқ берди, деб ёзади «Gazeta.uz».
«Қўчқоров, Ортиқовнинг иш фаолиятига давлат улуши мавжуд корхоналарни 2021 йилда уч бараварга қисқартириш натижалари бўйича баҳо берилади», — деган давлат раҳбари.
Президент бош вазир ўринбосари ва агентлик директорига март якунига қадар «Пойтахт» бизнес мажмуаси, 46 гектар ҳудудга эга «Белдирсой» ва 76 гектар майдонли «Чорвоқ» дам олиш маскани, 4 гектарли «Малика» савдо комплекси каби 12 та инвесторлар учун объектларнинг сотилишини таъминлаши зарурлигини айтган.
Акмалхон Ортиқовга апрель ойида «Кварц», «Жиззах пластмасса», «Кафолат суғурта» каби 18 та корхоналардаги давлат улушини сотиш вазифаси юклатилган. 2021 йилнинг биринчи ярмига қадар бюджетга 1 триллион сўм тушум тушиши шарт, дея таъкидлаган Президент.
Эслатиб ўтамиз, Давлат активларини бошқариш агентлиги фаолиятини ташкил этиш тўғрисидаги Президент қарори 2019 йилнинг январаида қабул қилинган ва Нодир Жўраев агентликка директор этиб тайинланган эди. Ўтган йилнинг октябрь ойида эса Президент давлат кўчмас мулкларини оммавий савдоларда хусусий секторга сотишга оид фармонни имзолаган эди.
Аввалроқ «Тошкент савдо маркази» 242,8 миллиард сўмга сотилгани, Россиянинг «МегаФон» ва USM Telecom алоқа компанияси Ўзбекистон бозорига кираётгани, Coca-Cola Uzbekistan’нинг давлат улушига талабгорлар аниқлангани тўғрисида хабар берилганди.
Изоҳ (0)