Наманган шаҳрида содир бўлган йўл-танспорт ҳодисаси оқибатида 3 киши ҳалок бўлди. Бу ҳақда «Севимли» телеканалининг «Замон» информацион дастурида маълум қилинди.
Маълум қилинишича, 8 февраль куни соат 23:50 да Наманган шаҳридаги Ислом Каримов кўчасида 20 ёшли Lacetti ҳайдовчиси йўл четидаги реклама таблосига бориб урилган. Мавжуд маълумотларга кўра, авариядан олдин ҳайдовчи машинани соатига 130—140 километр тезликда бошқараётган бўлган.
Таъкидланишича, машина ичида ҳайдовчидан ташқари яна икки нафар 19 ёшли йўловчи бўлган. Олинган тан жароҳатлари оқибатида уларнинг барчаси воқеа жойида вафот этган.
Аввалроқ Фарғонада 20 ёшли қиз «Москвич»нинг Катта Фарғона каналига тушиб кетиши оқибатида ҳалок бўлгани, Қорақалпоғистонда Howo ва Nexia иштирокида содир бўлган ЙТҲ оқибатида 5 киши вафот этгани, Бухорода уч нафар болани уриб юбориб, воқеа жойидан қочган ҳайдовчи шахсига кузатув камералари орқали аниқлик киритилгани тўғрисида хабар берилганди.
Изоҳ (0)