Самарқанд вилоятидаги қурилиш-таъмирлаш ишларида 7 млрд сўм талон-торож қилинган

Самарқанд вилоят прокуратураси томонидан ўтказилган назорат тадбирлари давомида вилоятда олиб борилаётган қурилиш-таъмирлаш ишларида 7 миллиард сўмдан ортиқ пул нотўғри сарфлангани аниқланди. Бу ҳақда «Дарё»га прокуратура ахборот хизмати хабар берди.

Маълум қилинишича, 2020 йил ишлаб чиқариш инфратузилмасини ривожлантириш дастури доирасида бюджет маблағлари ҳисобидан вилоятда жами 227 та, жумладан, 3 та йилдан йилга ўтувчи ва 8 та нолдан бошланадиган объектларни қуриш, реконструкция қилиш, капитал таъмирлаш ва жиҳозлаш ишларига 1 миллиард 189 миллион 4 00 минг сўм ажратилган.

Шунингдек, Президентнинг «Коронавирус пандемияси ва глобал инқироз ҳолатларининг иқтисодиёт тармоқларига салбий таъсирини юмшатиш бўйича биринчи навбатдаги чора-тадбирлар тўғрисида» фармони ҳамда Вазирлар Маҳкамаси раёсат мажлиси баёнига асосан Инқирозга қарши курашиш жамғармаси ҳисобидан 57 та объектларни қуриш, реконструкция қилиш, капитал таъмирлаш ва жиҳозлаш ишларига 193 миллиард 900 миллион сўм ажратилган.

Бундан ташқари, Вазирлар Маҳкамаси қарори ҳамда раёсат йиғилиши баёнларига асосан Самарқанд вилоятини ривожлантириш жамғармаси маблағлари ҳисобидан 12 та объектни параллел қуриш, реконструкция қилиш, капитал таъмирлаш ва жиҳозлаш ишларига 239 миллиард 800 миллион сўм ажратилган.

Шундан, Самарқанд шаҳрининг Гулобод кўчаси бўйлаб Хўжа Аҳрор Вали тарихий обидасидан Термиз кўчасигача бўлган ҳудудда 1407 метр сув ва оқова тармоғини қурилишида пудратчи ташкилот томонидан бажарилмаган ишларга 78 миллион 600 минг сўм қўшиб ёзилиб, талон-торож қилинган; Афросиёб кўчасида ичимлик суви қудуқлари қурилишида 85 миллион сўмлик қурилиш-монтаж ишлари бажарилмаган; Самарқанд шаҳри ва Пастдарғом туман ободонлаштириш бошқармалари ҳамда «Сувоқова» давлат унитар корхонаси томонидан тўғридан-тўғри импорт амалга оширилмасдан, маҳаллий корхоналардан қиммат нархларда харид қилиниши оқибатида 1,5 миллиард сўмлик техника ва асбоб-ускуналар импорт нархидан қимматга сотиб олиниб, давлат ва жамиятнинг қонуний манфаатларига жиддий зиён етказилган.

Мазкур ҳолатлар юзасидан Жиноят кодексининг тегишли моддалари билан жиноят иши қўзғатилган. Ва вилоят прокуратураси томонидан тергов ишлари олиб борилмоқда.