Prezident Shavkat Mirziyoyev 10-fevral kuni bo‘lib o‘tgan videoselektor yig‘ilishida bosh vazir o‘rinbosari, iqtisodiy taraqqiyot va kambag‘allikni qisqartirish vaziri Jamshid Qo‘chqorovga va Davlat aktivlarini boshqarish agentligi direktori Akmalxon Ortiqovga davlat ulushlari mavjud korxonalarni xususiylashtirish jarayonlarini tezlashtirish bo‘yicha topshiriq berdi, deb yozadi “Gazeta.uz”.
“Qo‘chqorov, Ortiqovning ish faoliyatiga davlat ulushi mavjud korxonalarni 2021-yilda uch baravarga qisqartirish natijalari bo‘yicha baho beriladi”, — degan davlat rahbari.
Prezident bosh vazir o‘rinbosari va agentlik direktoriga mart yakuniga qadar “Poytaxt” biznes majmuasi, 46 gektar hududga ega “Beldirsoy” va 76 gektar maydonli “Chorvoq” dam olish maskani, 4 gektarli “Malika” savdo kompleksi kabi 12 ta investorlar uchun obyektlarning sotilishini ta’minlashi zarurligini aytgan.
Akmalxon Ortiqovga aprel oyida “Kvars”, “Jizzax plastmassa”, “Kafolat sug‘urta” kabi 18 ta korxonalardagi davlat ulushini sotish vazifasi yuklatilgan. 2021-yilning birinchi yarmiga qadar budjetga 1 trillion so‘m tushum tushishi shart, deya ta’kidlagan Prezident.
Eslatib o‘tamiz, Davlat aktivlarini boshqarish agentligi faoliyatini tashkil etish to‘g‘risidagi Prezident qarori 2019-yilning yanvaraida qabul qilingan va Nodir Jo‘rayev agentlikka direktor etib tayinlangan edi. O‘tgan yilning oktabr oyida esa Prezident davlat ko‘chmas mulklarini ommaviy savdolarda xususiy sektorga sotishga oid farmonni imzolagan edi.
Avvalroq “Toshkent savdo markazi” 242,8 milliard so‘mga sotilgani, Rossiyaning “MegaFon” va USM Telecom aloqa kompaniyasi O‘zbekiston bozoriga kirayotgani, Coca-Cola Uzbekistan’ning davlat ulushiga talabgorlar aniqlangani to‘g‘risida xabar berilgandi.
Izoh (0)