Латвия икки ҳафта давомида Европа Иттифоқининг барча мамлакатлари, Евроиқтисодиёт ҳудуди, Швейцария ва Буюк Британиядан келувчиларни муҳим бўлмаган сабабларга кўра мамлакатга киришини тақиқлади. Тақиқ 11 февралдан 25 февралгача амал қилади, деб ёзмоқда «Korrespondent.net».
Фавқулодда ҳолатни жорий этиш тўғрисидаги ушбу фармонга киритилган ўзгартиришлар шуни кўрсатадики, Латвияга кириш учун фақат фавқулодда ва муҳим сабаблар, жумладан, ўқиш, оилага қайтиш, даволаниш, транзит ёки вояга етмаганларни кузатиб қўйиш, доимий яшаш жойига қайтиш ёки дафн маросимида қатнашиш сингари ҳолатларда рухсат берилади.
Ўзгартиришлар, шунингдек, Британия, Ирландия ва Португалияга борувчи ва ушбу мамлакатлардан келувчи халқаро йўловчиларни ташиш вақтинча аэропорт, денгиз порти ва автобуслар орқали амалга оширилишини назарда тутади. Чунки мазкур мамлакатларда янги штаммлар кенг тарқалган.
Шунингдек, Транспорт вазирлиги рухсати билан йўловчи ташиш беш кишидан кўп бўлмаган ҳолда хусусий ҳаво транспорти ва бизнес-рейслар, фавқулодда йўловчи ташиш транзитлари, ходимларни иш жойига етказиш учун, спортчиларни чет элда ўтказиладиган мусобақалар ва Латвиядаги халқаро мусобақаларда қатнашиш учун махсус ташкиллаштирилган ҳолатда амалга оширилиши мумкин.
COVID-19 билан касалланган фуқаролар Латвияга қуруқлик орқали фақатгина шахсий транспортда қайтиши мумкин. Бундан ташқари, ушбу чекловлар икки ҳафтадан кўпроқ давом этиши мумкин, аммо бу эпидемиологик вазиятга боғлиқ.
Эслатиб ўтамиз, Латвия коронавирус эпидемияси сабабли мамлакатда жорий қилинган фавқулодда ҳолат режимини 6 апрелга қадар узайтирган эди. Европа Иттифоқи эса Шенген ҳудудига кириш учун қўшимча чекловларни жорий этган.
Буюк Британияда эса 15 февралдан бошлаб COVID-19 хавфи юқори бўлган давлатлардан ташриф буюрувчилар учун икки ҳафталик мажбурий карантин жорий этилади. «Қора рўйхат»даги мамлакатлардан қайтган фуқаролар ўн кунни «COVID-меҳмонхоналар»да ўтказиши керак.
Изоҳ (0)