COVID-19 билан касалланмаган ва эмлаш жараёнидан ўтмаган киши эҳтиёт чораларини кўриши керак, чунки жамоавий иммунитет уни касалликдан ҳимоя қила олмайди. Бу ҳақида иммунолог Владимир Болибокнинг сўзларига асосланиб, «РБК» хабар берди.
«Жамоавий иммунитетнинг индивидуал шахсга ҳеч қандай таъсири йўқ. Иммунитетга эга бўлмаган киши касал одам билан алоқада бўлган тақдирда унда касалликни юқтириш хавфи пайдо бўлади. Унинг дастлабки ҳолатига қараб касаллик енгил ёки жуда оғир шаклда кечиши мумкин», — дея тушунтирди иммунолог.
Болибок, шунингдек, жамоавий иммунитети эпидемияга қарши чораларни режалаштиришдагина муҳим аҳамият касб этишини қўшимча қилди.
Баъзи сабабларга кўра эмлаш жараёнидан ўтолмайдиганлар учун иммунолог эҳтиёт чоралари масаласига эътибор билан ёндашишни маслаҳат берди. Унинг сўзларига кўра, мазкур чораларгина коронавирусга қарши иммунитети йўқ одамлар учун касал бўлмаслик имконини беради.
Аввалроқ Қуддус Ҳаддаса Айн Карам университети касалхонаси бўлими мудири, иммунолог профессор Полина Степенская болаларнинг коронавирус инфекциясига қарши эмланмаслиги жамоавий иммунитет пайдо бўлишига тўсқинлик қилмаслигини таъкидлаганди. Унинг ҳисоб-китобларига кўра, жамоавий иммунитетни шакллантириш учун аҳолининг 43-75 фоизи инфекция юқтирган ёки эмланган бўлиши етарли.
Жонс Ҳопкинс университети маълумотига кўра, бутун дунёда 107 миллиондан ортиқ одам коронавирус билан касалланган, шундан 2,3 миллиондан ортиқ бемор вафот этган.
Аввалроқ Bloomberg коронавирус пандемияси қачон тугашини ҳисоблаб чиққан эди. Ҳисоб-китоблар учун вакциналар ҳажми асос қилиб олинди, чунки илмий жамоатчилик фикрига кўра, пандемияни енгиш учун дунё аҳолисининг 70-85 фоизи эмланиши керак.
Америкалик олимлар эса COVID-19’га қайта чалиниш сабабларини маълум қилган.
Изоҳ (0)