Ўзбекистонда 2021 йилда 31 та янги мактаб қурилади, 320 таси таъмирланади

2021 йилги давлат дастурига кўра, Ўзбекистонда 31 та янги мактаб қуриш ҳамда 320 та мактабни таъмирлаш белгиланган. Янги мактабларни қуриш, мавжудларини таъмирлашга жами 2 триллион 50 миллиард сўм ажратиш режа қилинган, деб хабар беради «Gazeta.uz».

Таъкидланишича, бундан ташқари, Андижон, Нурафшон, Гулистон, Навоий ва Термиз шаҳарларида Президент мактаблари қурилишига 200 миллиард сўм йўналтирилади. Шунингдек, 16 та ОТМ бинолари янгидан қурилади ва 19 таси таъмирланади. Ушбу мақсадларга 700 миллиард сўм ажратилмоқда. Яна 900 миллиард сўм 22 та мактабгача таълим ташкилоти биносини янгидан қуриш ва 203 тасини таъмирлашга сарфланади.

Шу билан бирга, 24 та соғлиқни сақлаш объекти янгидан қурилади, мавжуд 99 таси эса таъмирланади. Бу жами 1,4 триллион сўм эвазига амалга оширилади. 23 та янги спорт объекти қурилади, 34 таси эса таъмирланади. Бунга сарфланадиган маблағ 400 миллиард сўм этиб белгиланган.

Мазкур ишлар ижроси йил давомида тегишли вазирликлар томонидан таъминланиши қайд этилган.

Аввалроқ Ўзбекистондаги 300 дан ортиқ мактаб қўлбола печлар ёрдамида иситилаётгани, Ўзбекистонда аҳоли хонадонлари ис газини эрта аниқлайдиган газоанализаторлар билан жиҳозланиши ҳамда Ўзбекистон газ-заправкалари суткасига яна 24 соатдан ишлай бошлагани ҳақида хабар берилганди.