Россиянинг истеъмолчилар ҳуқуқларини ҳимоя қилиш ва инсон фаровонлигини назорат қилиш бўйича федерал хизмати— «Роспотребнадзор» COVID-19’ни тезкор аниқлаш учун янги юқори аниқликдаги тестни ишлаб чиқди. Бу ҳақда «Коммерсантъ» хабар берди.
Тест жараёнининг умумий вақти 1—1,5 соатни ташкил қилади, дейилади агентлик сайтида. Одатда ПЗР тести орқали вирусга ташхис қўйиш тўрт-беш соат давом этади.
«Янги тест ёрдамида COVID-19 вируси ташувчиларини дастлабки босқичдаёқ аниқлаш, тезда ижтимоий алоқаларни чеклаш ва тиббий назоратни кучайтириш мумкин. Юқоридаги афзалликлар туфайли тезкор таҳлилдан вирус юқишини кузатишда муҳим рол ўйнайдиган коронавирус юқишини назорат қилувчи тест (РОСТ)нинг асосий қисми сифатида фойдаланиш мумкин», — дея таъкидланади «Роспотребнадзор»да.
Айни пайтда Россияда коронавирусга қарши оммавий эмлаш ихтиёрий равишда олиб борилмоқда. Бироқ ҳудудларда шифокор ва ўқитувчиларни вақти-вақти билан «ихтиёрий-мажбурий» эмлаш жараёни тўғрисида ҳисобот берилади. «Роспотребнадзор» маълумотига кўра, пандемия бошидан бери мамлакатда COVID-19 учун 105,2 миллиондан ортиқ тест ўтказилган.
Эслатиб ўтамиз, Россияда коронавирусга чалинганлар сони 4 миллиондан ошди. Ўтган бир кеча-кундуз давомида COVID-19 юқтириш бўйича 14 494 та янги ҳолат аниқланиб, вирусга чалинганлар сони жами 4 012 710 нафарга етди.
Аввалроқ Россия таркибига кирувчи Удмуртияда 12 февралдан бошлаб ҳимоя ниқобларини мажбурий тақиш бекор қилингани ҳақида хабар берилганди.
Изоҳ (0)