Germaniya kansleri Angela Merkel koronavirus tarqalishi sababli to‘liq lokdaunni 1-martga qadar uzaytirmoqchi, deb yozadi “RIA Novosti” Bild nashriga asoslanib.
Nashrning yozishicha, kansler 10-fevral kuni federativ hududlar (viloyatlar) rahbarlari bilan uchrashuvda shunday taklif bilan chiqadi. Hukmron Xristian Demokratik Ittifoqi partiyasini yoqlovchi hududlarning bosh vazirlari uning taklifini qo‘llab-quvvatlamoqchi.
Merkel lokdaunni 1-martga qadar uzaytirib, so‘ngra maktablar, bolalar bog‘chalari va sartaroshxonalar faoliyatiga ruxsat bergan holda cheklovlarni bosqichma-bosqich bekor qilmoqchi.
Bild nashri ta’kidlashicha, lokdaunni uzaytirish bo‘yicha yakuniy qaror hali qabul qilinmagan.
Jahon sog‘liqni saqlash tashkilotining ma’lumotlariga ko‘ra, Germaniyada deyarli 2,3 million kishida koronavirus kasalligi aniqlangan, virus oqibatida 61,6 ming kishi vafot etgan.
Eslatib o‘tamiz, Germaniyada koronavirus bilan bog‘liq og‘ir vaziyat tufayli 16-dekabrdan boshlab kamida 10-yanvarga qadar davom etuvchi qat’iy lokdaun joriy etilgan edi. Keyin lokdaun 31-yanvargacha uzaytirildi. Shundan so‘ng, 20-yanvarda lokdaun yana bir bor uzaytirilib, cheklovlarni bekor qilish muddati 14-fevral etib belgilandi.
Bundan avval kuchli qor yog‘ishi tufayli Germaniya va Niderlandiyada transport harakati to‘xtab qolgani, Germaniya koronavirus uchun zaxira vaksinalarga buyurtma bergani hamda Fransiya, Chexiya va Germaniya mamlakatga kirish cheklovlarini kuchaytirgani haqida xabar berilgandi.
Izoh (0)