Ўзбекистонда 3 та хусусий бандлик агентлигининг фаолияти вақтинча тўхтатилди. Бу ҳақда Бандлик ва меҳнат муносабатлари вазирлиги матбуот хизмати хабар берди.
Маълум қилинишича, Тошкент туманлараро Иқтисодий судининг 2021 йил 7 январдаги ҳал қилув қарорига асосан Kontinent himoya xususiy bandlik agentligi МЧЖ лицензияси, ушбу суднинг 25 январдаги ҳал қилув қарорига асосан эса Xususiy bandlik agentligi manpower МЧЖ ҚК лицензияси вақтинчалик тўхтатилди.
Шунингдек, Андижон туманлараро Иқтисодий судининг 2021 йил 29 январдаги ҳал қилув қарорига асосан Bek jobs xususiy bandlik agentligi МЧЖнинг лицензияси вақтинчалик тўхтатилган.
Қайд этилишича, лицензияларнинг амал қилиниши Бандлик ва меҳнат муносабатлари вазирлиги ҳузуридаги Хорижда меҳнат фаолиятини амалга оширувчи шахсларни қўллаб-қувватлаш ҳамда уларнинг ҳуқуқ ва манфаатларини ҳимоя қилиш жамғармаси депозит ҳисоб рақамида базавий ҳисоблаш миқдори (9 февраль ҳолатига кўра 245 минг сўм)нинг 8500 баравари (2 миллиард 82 миллион 500 минг сўм) миқдоридаги маблағларни захира қилингунга қадар тўхтатилган.
Аввалроқ Ўзбекистонда 4 та хусусий бандлик агентлигининг лицензияси бекор қилингани ҳақида хабар берилган эди.
2020 йилнинг ноябрида Ўзбекистондаги 3 та хусусий бандлик агентлигининг лицензияси бекор қилинган ҳамда 20 та хусусий бандлик агентлигининг лицензияси вақтинча тўхтатилганди.
Изоҳ (0)