Навоийда 3 ойлик боласини икки хонали квартирага алмашмоқчи бўлган аёл «маҳалладан берилган ижобий тавсифнома» сабаб озодликдан маҳрум этилмади

Жиноят ишлари бўйича Кармана тумани суди 3 ойлик чақалоғини қиймати 25 минг долларга тенг икки хонали квартирага алмашмоқчи бўлган аёлга нисбатан ҳукм чиқарди. Бу ҳақда ЎзА хабар бермоқда.

Асли хатирчилик А.И. ишлаш мақсадида Навоий шаҳрига келиб, ижарада яшаб юрган. 2019 йил ёзида бир йигит билан яқин муносабатда бўлиб, ундан ҳомиладор бўлиб қолган. Буни эшитган отаси уни уриб, қишлоқда гап-сўзга қолмаслик учун болани олдириб ташлашини талаб қилган. Аммо аёл боласини олдиртирмаган, ўзи яшаётган қишлоққа ҳам қайта олмаган.

Шаҳарда ижарада яшаганлиги, ҳеч қаерда ишламагани, моддий жиҳатдан қийналгани боис, хабар беришларича, аёл ўз боласини сотишга қарор қилган. Фарзандсизликдан қийналган фуқаро билан танишиб, унга боласини 25 минг долларга сотмоқчи эканини айтган. «Талабгор» бола учун шу нархга баҳоланган икки хонали уй беришни таклиф қилган.

А.И. Кармана тумани ҳудудида жойлашган «Қосим Шайх» масжиди ёнида Навоий шаҳридаги хонадоннинг кадастр ҳужжатларини олиб, эвазига чақалоғини «харидор»га топшираётган вақтида Навоий вилоят ИИБ ва Кармана туман ИИБ ходимлари томонидан далилий ашёлар билан ушланган (хабарда воқеа айнан қачон бўлганига аниқлик киритилмаган).

Жиноят ишлари бўйича Кармана туман суди 1987 йилда туғилган, ҳали турмушга чиқмаган А.И.га нисбатан жиноят иши кўриб чиқиб, уни Жиноят кодексининг 135-моддаси 3-қисми «а» бандида (18 ёшга тўлмаганлиги айбдорга аён бўлган шахсни олиш-сотиш) кўрсатилган жиноятни содир қилганликда айбли деб топган (ушбу модда бўйича айбдорлар камида саккиз йилга озодликдан маҳрум этилади).

«Суд аёлнинг қилмишидан пушаймонда эканлиги, муқаддам судланмаганлиги, маҳалла томонидан берилган ижобий тавсифнома ва кафиллик хатини инобатга олиб, уни жамиятдан ажратмаган ҳолда ахлоқан тузатиш имконияти мавжуд деб ҳисоблаб, Жиноят кодексининг 57-моддасини (енгилроқ жазо тайинлаш) қўллаб, озодликни чеклаш жазосини тайинлади», — дейилади агентлик ахборотида.

Шунингдек, унга ҳар ойда бир маротаба Хатирчи тумани ИИБдан рўйхатдан ўтиб туриш, назорат қилувчи органнинг розилигисиз яшаш жойини ўзгартирмаслик ва Навоий вилояти ҳудудини тарк этмаслик каби қўшимча чеклашлар юклатилган.