Coca-Cola Uzbekistan’нинг давлат улушига талабгорлар аниқланди. Улар орасида Африка компаниялари ҳам бор

Coca-Cola Uzbekistan компаниясидаги давлат улушини сотиш бўйича жараённинг биринчи босқичи якунланди, дея хабар бермоқда Давлат активларини бошқариш агентлиги.

Хабар беришларича, давлат улушини сотиб олиш бўйича таклифлар Осиё, Европа, Америка ва Африка давлатларидаги бир қатор талабгорлардан келиб тушган. Улар компаниянинг иккинчи мулкдори — Coca-Cola Group билан келишилган ҳолда кўриб чиқилган.

«Сотиш учун белгиланган мезонларга мос келган деб эътироф этилган талабгорлар кейинги босқичга ўтказилди. Ушбу талабгорлар билан музокаралар жараёни давлат улушини сотиш бўйича жалб этилган халқаро маслаҳатчилар — Rothschild & Cie инвестиция банки (молиявий маслаҳатчи, Франция) ва Dentons юридик фирмаси (юридик маслаҳатчи, Буюк Британия) иштирокида давом эттирилади», — дейилади агентлик ахборотида.

Мазкур босқичда талабгорлар билан Ошкор этмаслик тўғрисидаги тегишли битимлар (NDA) имзоланади, уларга Coca-Cola Uzbekistan тўғрисидаги қўшимча маълумотлар тақдим этилади. Агентлик ахборотида талабгор компаниялар номи ошкор этилмаган, бироқ аввалроқ талабгорлар орасида Coca-Cola’нинг Туркиядаги шуъбаси борлиги маълум бўлган эди.

Coca-Cola Uzbekistan (Coca-Cola Ichimligi Uzbekiston, Ltd) фойда келтирувчи корхона ҳисобланади. Spot’нинг ёзишича, компания 2018 йилда жами 999,4 миллиард сўм, 2019 йилда эса 1,4 триллион сўм даромад олган. Соф фойда ҳажми эса 2018 йилда 91,3 миллиард сўмни, 2019 йилда эса 207,1 миллиард сўмни ташкил этган.

Компаниянинг қарздорлиги 2019 йилда 52,4 миллиард сўмни ташкил этган, бошқалар эса Coca-Cola Uzbekistan’га 100,6 миллиард сўм қарз бўлган. Корхона йилига ўртача 200 миллиард сўм атрофида солиқ тўлайди — 2018 йилда 213,1 миллиард, 2019 йилда эса 184 миллиард сўм солиқ тўланган.