Ўзбекистон футбол ассоциациясида (ЎФА) 9 февраль куни биринчи вице-президент Равшан Эрматов ҳамда Туркий Кенгаш бош котиби Багдад Амреев бошчилигидаги делегация ўртасида учрашув бўлиб ўтди.
Учрашувда Туркий Кенгаш аъзо мамлакатларида спортни, хусусан футболни ривожлантириш ва оммалаштириш, терма жамоалар ҳамда клублар ўртасида халқаро мусобақаларни ташкил этиш, футбол ҳакамларини қайта тайёрлаш ва ўзаро тажриба алмашиш, футбол ассоциациялари ва федерациялари ўртасида ҳар томонлама ҳамкорликни йўлга қўйиш масалалари муҳокама қилинди.
Суҳбат давомида ташкилотга аъзо мамлакатлар миллий ва турли ёш тоифасидаги терма жамоалари ўртасида халқаро мусобақалар ташкил этиш имкониятларини кўриб чиқиш масаласига алоҳида тўхталиб ўтилди.
Шунингдек, Багдад Амреев Туркия Суперкубогини Ўзбекистонда ўтказиш бўйича Туркий Кенгаш музокаралар олиб бориб, ташкилот ҳомийлигида мазкур баҳсни Ўзбекистонда бўлиб ўтишини таъминлаш юзасидан ўз таклифларини берди.
Ўз навбатида, Равшан Эрматов Туркий Кенгаш бош котибига ташриф ва самимий суҳбат учун миннатдорчилик изҳор этди ҳамда ЎФА юқорида тилга олинган таклифлар юзасидан ўзаро ҳамкорлик қилишга тайёр эканлигини билдирди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)