Халқ депутатлари Фарғона шаҳар кенгашининг 9 февраль куни бўлиб ўтган навбатдан ташқари сессиясида шаҳарнинг янги прокурори ва шаҳар ИИБнинг янги бошлиғи жамоатчиликка таништирилди, дея хабар бермоқда вилоят ҳокимлиги ахборот хизмати.
Шу вақтгача Фарғона вилояти прокурорининг ўринбосари сифатида ишлаб келган Дилмурод Қобулович Қобулов Ўзбекистон бош прокурорининг буйруғи билан Фарғона шаҳри прокурори этиб тайинланган.
Қобулов 1981 йилда Андижон вилояти Балиқчи туманида туғилган. Андижон вилоят прокуратурасида ҳамда Ўзбекистон Бош прокуратурасида маъсул вазифаларда ишлаган. Тошкент вилоятининг Оҳангарон тумани ва шаҳри, Тошкент шаҳрининг Бектемир тумани прокурори лавозимларида фаолият олиб борган.
Шу вақтгача Фарғона вилояти ИИБ бошлиғининг ўринбосари — ҳуқуқбузарликлар профилактикаси бошқармаси бошлиғи сифатида ишлаб келган подполковник Дилмурод Қобилович Асқаров Ўзбекистон ички ишлар вазирининг буйруғи билан Фарғона шаҳар ИИБнинг бошлиғи этиб тайинланди.
Асқаров 1979 йилда Тошлоқ туманида туғилган. 2002 йилдан ички ишлар тизимида турли вазифаларда фаолият олиб борган. Марғилон шаҳар ИИБ бошлиғининг биринчи ўринбосари, Қува туман ИИБ бошлиғи лавозимларида ишлаган.
Шунингдек, Нуриддин Аҳмаджонович Эркабоев Фарғона шаҳар давлат солиқ инспекцияси бошлиғи этиб тайинланган. Эркабоев 1983 йилда Бешариқ туманида туғилган. Тошкент молия институтини тамомлаган. Тошкент шаҳар солиқ бошқармасида турли масъул лавозимларда фаолият олиб борган.
Жорий тайинловга қадар Йирик солиқ тўловчилар бўйича ҳудудлараро давлат солиқ инспекцияси Солиқ назорати бўлими Геология ва ёқилғи-энергетика комплексларининг солиқ назорати шуъбаси бошлиғи бўлиб ишлаб келган.
Аввалроқ Фарғона вилояти ҳокимининг биринчи ўринбосари Мирзоҳид Убайдуллаев Фарғона шаҳри ҳокими этиб тайинлангани ҳақида хабар берилган эди. Шаҳарнинг аввалги «тўртлиги» президент Шавкат Мирзиёев «Шодиёна» маҳалласига ташриф буюрганидан сўнг ишдан олинган эди.
Изоҳ (0)