Abdulla Aripov Olmaotada Qirg‘iziston bosh vaziri Ulug‘bek Maripov bilan uchrashdi
O‘zbekiston bosh vaziri Abdulla Aripov Yevrosiyo hukumatlararo kengashining navbatdagi yig‘ilishida ishtirok etish uchun ish safari doirasida Qirg‘iziston bosh vaziri Ulug‘bek Maripov bilan uchrashdi.
Qirg‘iziston hukumati matbuot xizmatining xabar berishicha, hukumat rahbarlari savdo-iqtisodiy, investitsiyalar, qishloq xo‘jaligi, madaniy-gumanitar, suv-energetika va transport sohalaridagi ikki tomonlama hamkorlikning ko‘plab masalalarini muhokama qildi.
“Qirg‘iziston Respublikasi o‘zaro ishonchga asoslangan, o‘rnatilgan chinakam qardoshlik munosabatlarini qadrlaydi. Biz O‘zbekiston Respublikasi bilan strategik sheriklikni faol rivojlantirishni davom ettirishga tayyormiz”, — degan Ulug‘bek Maripov.
Abdulla Aripov Ulug‘bek Maripovni Qirg‘iziston bosh vaziri etib tayinlangani bilan tabriklab, o‘zbek-qirg‘iz munosabatlari eng yuqori ishonch darajasida ekanligini ta’kidlagan.
Tomonlar qo‘shma loyihalarni amalga oshirishga tayyorligini bildirgan. Qirg‘iz-o‘zbek davlat chegarasining qolgan yer maydonlarini qonuniy ro‘yxatdan o‘tkazishni yakunlash bo‘yicha ishlarni kuchaytirish zarurligi ta’kidlangan. Shuningdek, O‘zbekiston Qirg‘izistonga zarur miqdorda mineral o‘g‘itlar yetkazib berishni tashkil etishga tayyorligini ma’lum qilingan.
Uchrashuv yakunida Abdulla Aripov O‘zbekistonga tashrif buyurish haqida Qirg‘iziston prezidenti Sadir Japarovga taklifnomani yetkazgan.
Eslatib o‘tamiz, Abdulla Aripov 3-fevral kuni 41 yoshli Ulug‘bek Maripovga Qirg‘iziston bosh vaziri etib tayinlangani munosabati bilan tabrik maktubini yo‘llagandi.
