Мьянмада ҳокимият ҳарбийлар қўлига ўтганидан сўнг норозилик намойишлари бўлиб ўтмоқда

Мьянма аҳолиси 6 февраль куни Янгон кўчаларига чиқиб, ҳарбийлар томонидан ҳокимият эгаллаб олинишига қарши чиқди. Бу ҳақда «ТАСС» хабар қилмоқда.

Frontier Myanmar нашри хабар беришича, Инсеин-роуд кўчасидаги митинг тинч тарзда ўтмоқда, полициячилар намойишчиларни тарқатиб юбормаяпти.

Одамлар ҳарбийларга қарши эканини билдирмоқда, ҳибсга олинган юқори мартабали амалдорларни, жумладан, давлат маслаҳатчиси Аун Сан Су Чжи ва президент Вин Мйинни озод этишни талаб қилмоқда.

Турли ҳисоб-китобларга кўра, норозилик намойишларида бир неча юздан бир неча минггача одамлар қатнашмоқда. Интернет билан боғлиқ муаммоларга қарамай, баъзи нашрлар шаҳар бўйлаб юрган кўплаб намойишчилар тасвирланган қисқа видеоларни тармоққа жойлаштиришга муваффақ бўлган.

Шу билан бирга, ҳар куни маҳаллий вақт билан соат 20:00 дан бошлаб Мьянманинг кўплаб шаҳарларида аҳоли норозилик намойишларини уюштирмоқда. Улар қозон, турли идиш ва бошқа ошхона анжомларини уриб, ўз норозилигини билдирмоқда. Ижтимоий тармоқларда эълон қилинган видеоларга кўра, кундан кунга норозилик иштирокчиларининг сони кўпаймоқда.

Эслатиб ўтамиз, 1 февраль куни Мьянма ҳарбийлари мамлакатда ҳокимиятни қўлга киритганини эълон қилди, ҳукмрон партия раҳбарлари ва мамлакат президенти ҳибсга олинди. Қуролли кучлар бош қўмондони Мин Аунг Хлайн мамлакатнинг муваққат президенти этиб тайинланди ва мамлакатда бир йил муддатга фавқулодда ҳолат жорий этилди.

Давлат тўнтаришига сабаб қилиб ўтган йилги сайловлардаги сохталиклар ва сайлов комиссиясининг ҳаракатсизлиги кўрсатилди. 2020 йил ноябрда бўлиб ўтган сайловларда «Демократия учун миллий лига» партияси ҳукумат тузиш учун етарлича овоз тўплаган, ҳарбийлар томонидан қўллаб-қувватланган партия эса мағлуб бўлган.

БМТ бош котиби Антониу Гутерриш қуролли кучларнинг ҳаракатларини «Мьянмада амалга оширилган демократик ислоҳотларга жиддий зарар етказиш» дея қоралади. Шунингдек, АҚШ давлат котиби Энтони Блинкен Мьянма давлат раҳбарларининг ҳибсга олинишидан хавотир билдирди ва ҳарбийларни ҳибсга олинган сиёсатчиларни озод қилишга чақирди.

Ҳарбийлар, шунингдек, ўтган йилги сайлов натижаларини қайта текшириш учун сайлов комиссиясини ислоҳ қилишга ва янги сайловлардан сўнг ҳокимиятни сайланган партияга топширишга ваъда берди.