Исроилда коронавируснинг «британча» мутацияси тарқалиши болалар орасида вирусга чалиниш ҳолатини икки ярим бараварга оширди. Бу эса Исроилнинг йирик клиник марказларида ихтисослашган педиатрик COVID реанимация бўлимлари очилишини талаб қилмоқда. Мутахассислар янги штаммларнинг тарқалиши ва ёш беморларнинг сони ортиши ўртасидаги боғлиқликни аниқлашга уринмоқда. Бу ҳақда Қуддусдаги Хадасса Эйн Карем касалхонасида очилган педиатрик COVID реанимация бўлимининг етакчи педиатри, доктор Асаф Мандель берган маълумотга таяниб «РИА Новости» хабар берди.
«Айниқса, Қуддусда касалхоналарга коронавирусга чалинган болаларнинг мурожаати тобора ортаётгани маълум бўлди. Шунинг учун ёш беморлар учун коронавирус бўйича реанимация бўлимини очишга тўғри келди. Мутация болаларга қанчалик таъсир қилишини ҳали билмаймиз. Ҳозирда бу борада интенсив изланиш олиб борилмоқда, умид қиламанки, тез орада керакли жавобни оламиз», — деди доктор Мандель.
Исроилда кунлик коронавирус инфекцияларининг 70 фоизини ташкил қилаётган мазкур мутация кўпроқ болаларга таъсир қилади, дея тахмин қилинмоқда. Бу тахминлар ҳали илмий тасдиқланмаган, болалар орасида касалликнинг ортиши бошқа, жумладан, ижтимоий омилларга боғлиқ бўлиши ҳам мумкин, дейди иммунолог, профессор Полина Степенская. Тахминлар илмий тасдиғини топгунга қадар биз вазиятга болалардаги ўзига хослик, вирус юқтиришга генетик мойилликнинг бор ёки йўқлиги ва шу сингари омилларни ўрганиш орқали изоҳ берамиз, дея қўшимча қилди шифокор.
Профессорнинг таъкидлашича, Қуддуснинг православ туманлари аҳолисининг аксарият қисми Соғлиқни сақлаш вазирлигининг чекловларига риоя қилмаётгани болаларда касалликнинг ортишига таъсир қилувчи ижтимоий омиллардан биридир. Шу билан бирга, Исроилдаги юқори суръатларда амалга оширилаётган вакцинация ишлари эпидемияни тўхтатиш учун жуда муҳим, чунки мамлакатда қўлланилаётган Pfizer вакцинаси «британча» штаммга қарши самарадор натижа кўрсатган.
Бироқ Исроил Соғлиқни сақлаш вазирлигининг режасига кўра, 16 ёшгача бўлган болалар ҳали эмланмаган, чунки вакцинанинг болаларга нисбатан клиник синовлари ҳали тугалланмаган.
Хадаса касалхонаси педиатрик COVID бўлими ходимлари касалхонага оғир аҳволда ётқизилган болалар орасида сурункали хасталиги бўлмаган беморлар ҳам борлигини хавотир билан қайд этмоқда.«Бизда коронавирус туфайли ўта оғир пневмонияни бошдан кечираётган 9 ойлик чақалоқ бор эди. У бир неча кун реанимацияда бўлди. Хайрият, аҳволи тезда яхшиланиб, уни оддий бўлимга ўтказдик»,— деди доктор Мандел. Реанимациясидаги беморларнинг аксарияти оғир аҳволда бўлишига қарамай, улар орасида ўлим қайд этилгани йўқ.
«Айни пайтда иккита: олти ойлик чақалоқ ва икки яшар қизчада оғир сурункали касалликлар мавжуд ва улар коронавирусга қўшилиб, умумий ҳолатни оғирлаштирган. Шунинг учун улар сунъий нафас олдириш аппаратига уланган ҳолда беҳуш ётибди», — дейилади хабарда.
Аммо COVID реанимация бўлимидаги энг оғир беморларнинг ҳам ота-оналарига болаларини кўриш учун тун-у кун рухсат берилади. Фақат бунинг учун улар касалхона ходимлари сингари комбинезон кийиб олиши керак, деди шифокор.
Изоҳ (0)