Xiaomi компанияси бош директори Лей Цзюнь 3 февраль, чоршанба куни Weibo ижтимоий тармоғидаги саҳифаси орқали фойдаланувчиларга мурожаат қилиб, тез орада жуда қиммат смартфон ишлаб чиқарилишига шама қилди, деб ёзади IXBT.
Шунингдек, у Xiaomi ихлосмандларининг бу борадаги фикрларига ҳам қизиқиш билдирган.
«Агарда Xiaomi 1,5 минг долларлик юқори сифатли мобил телефонни ишлаб чиқарганида, харид қилган бўлармидингиз? Агарда сиз 1,5 минг доллардан қиммат смартфонни тақдим этмоқчи бўлганингизда, у қандай кўринишда бўларди? Изоҳларда ўз фикрингиз билан бўлишишга тортинманг», — деб ёзади Лей Цзюнь.
Маълум қилинишича, одатда Xiaomi бу каби сўровларни лойиҳалаш бошқичида эмас, балки бевосита тайёр маҳсулот анонси олдидан ўтказади. Шу сабабли бу қадар қиммат телефон тақдимотга тайёр ҳолда деб тахмин қилиш мумкин. Миш-мишларга кўра, Xiaomi ўзининг эгилувчан экранга эга биринчи смартфонини тақдим этиши лозим, бу каби нархи рақобатчиларнинг қарорига анча мос келади.
Аввалроқ АҚШ ва Хитой ўртасидаги савдо уруши бироз тинчланганига қарамай, санкциялар рўйхатидан яна 9 та компания, хусусан, Xiaomi ҳам ўрин олгани тўғрисида хабар берилганди. «Қора рўйхат»га тушиш америкаликларнинг ушбу Хитой компанияларига сармоя кирита олмаслиги ва уларда улуши бўлмаслигини билдиради. Тақиқ 2021 йил 11 ноябрдан кучга киради, бу вақтга қадар инвесторлар ўз акцияларини сотиб юбориши керак.
Изоҳ (0)